Qishning iliq ob-havosi ostida Ahad Qayumning uzuq-yuluq videolari muhokamasi bilan yana bir haftani o‘tkazdik. Dayjestimiz xabarlarida ham hafta ob-havosi singari iliqlik yo‘q emas. Falokatlar bo‘lmasa, narxlar joyida qolsa, yashirincha yozilgan baqir-chaqirli audiolar tarqalmasa – yaxshi hafta deganlari shu.
Koronavirus pandemiyasi cheklovlari yana-da yumshatilyapti. 28-yanvardan konsert-tomosha tadbirlarini tashkil etishga ruxsat berildi. Albatta, ma’lum shartlar asosida. Konsert saroylarining tomoshabin sig‘imini inobatga olgan holda tomoshabinlar sonini 50 foizdan oshirmagan holda tashkil etish; konsert saroylarining tomoshabin o‘rindiqlaridan oraliq masofani saqlagan holda foydalanilishini ta’minlash va bu borada oraliq masofani saqlash uchun talab etiladigan o‘rindiqlarni konservatsiya qilish; konsert saroylariga tashrif buyuruvchi tomoshabin hamda xizmat ko‘rsatuvchi xodimlar qat’iy niqobda bo‘lish talab qilinadi. Bu cheklov o‘tgan yilning 15-martida joriy qilingan, shundan keyin hamma konsertlar Instagram’ga ko‘chgandi.
Shu kuni kafe va restoranlar 23:00 gacha ishlashiga bo‘lgan taqiq ham olib tashlandi. Avvalroq to‘yxona, mehmonxona, restoran hamda kafelarda 30 kishidan ko‘p bo‘lgan ko‘ngilochar tadbirlarni koronavirusga PZR-test yoki ekspress-test tekshiruvi asosida tashkil etilishiga istisno tariqasida ruxsat berilgandi.
Ammo 30-yanvar kuni O‘zbekistonda ilk bor koronavirusning “britancha” shtammi qayd etildi. Bu voqeani kutilmagan deyish qiyin, chunki butun dunyoga tarqalayotgan britancha virus bizgacha yetib kelishiga ajablanmasa ham bo‘ladi (shunga qaramasdan, saytimizning “eng ko‘p o‘qilgan” bo‘limida turibdi). “Britancha” shtammni o‘zbekistonlik fuqaro Dubaydan yuqtirib keldi. Aytilishicha, bemorning ahvoli qoniqarli, shikoyati yo‘q. Yangi turning vatani bo‘lgan Buyuk Britaniya bosh vaziri Boris Jonsonning so‘zlariga ko‘ra, ushbu turdagi koronavirus avvalgilaridan 70 foizga yuqumliroq, lekin undan xavfliroq emas.
* * *
Aholining ko‘proq qismini uncha qiziqtirmagan, faqat ayrimlarni qiziqtirgan bir xabarimiz bor. Prezident saylovi dekabrda emas, oktabrda o‘tkaziladigan bo‘ldi. Qonundagi bandlardan biri bilan Prezident, Qonunchilik palatasi, Qoraqalpog‘iston Jo‘rqorg‘i Kengesi, shuningdek, viloyatlar, tumanlar va shaharlar davlat hokimiyati vakillik organlari uchun o‘tkaziladigan saylovlar sanasi dekabr oyining uchinchi o‘n kunligining birinchi yakshanbasidan oktabr oyining uchinchi o‘n kunligining birinchi yakshanbasiga ko‘chirildi (2021-yilda ushbu sana 24-oktabrga to‘g‘ri kelmoqda).
Oliy Majlis Qonunchilik palatasi saylov ikki oy oldinga ko‘chirilishini keyingi siyosiy tadbirlarni o‘tkazish, jumladan, Davlat dasturini qabul qilish va boshqa islohotlarning kechiktirilishiga sabab bo‘lishi bilan izohladi.
Shunday qilib, elektr va gaz muammolari boshlangan dekabr oyida emas, ayni pishiqchilik, hosillar yig‘ib-terilib, to‘ylar avj olgan, aholimizning kayfiyati soz bo‘lgan oktabr oyida prezident saylaymiz. Saylovda faol bo‘lamiz, aziz vatandoshlar.
* * *
Yigirma yildan beri teleekrandan tushmay kelayotgan eng umri uzoq intellektual o‘yin “Zakovat” yana davom etadi. “Zakovat” o‘tgan yillar davomida uchta telekanalda uzatildi. Ammo yaqinda namoyishi to‘xtab qolgandi. Shundan so‘ng Komil Allamjonov va Saida Mirziyoyeva “Zakovat” loyihasini otalig‘iga olgandi. Shu hafta Komil Allamjonov “Zakovat” intellektual klubi nodavlat-notijorat tashkiloti tuzilishi haqida xabar qildi. Mass-media fondi Vasiylik kengashi raisi o‘rinbosari, O‘zbekiston Gender tengligini ta’minlash bo‘yicha komissiyasi a’zosi Saida Mirziyoyeva ham bu yangilikni ulashdi va “...Xotin-qizlarni bu ajoyib intellektual o‘yinda faol qatnashib, o‘z potensiallarini namoyish etishga chaqiramiz”, deb yozdi.
Aytish lozimki, “Zakovat” ko‘rsatuvi orqali yuzlab yoshlar kashf qilindi. Ularning orasida katta muvaffaqiyatga erishganlari ko‘p. Loyiha o‘z vaqtida bilimdon yoshlarni jalb etishning uddasidan chiqqan va hozir ham istiqboli bor.
* * *
Odatda, dayjestimizga “Shou-biznes” sahifasidan xabar tanlamaymiz. Biroq oxirgi vaqtda shou-bizneschilarimiz faolligini oshirib shou-biznes formatida chiqib, hattoki, ijtimoiy-siyosiy ruknlarga o‘tib qolyapti. Bularning biri sobiq xonanda Jahongir Otajonovdir.
Avvalroq u prezidentlikka nomzodini qo‘ymoqchiligi haqida gapirib, shov-shuvni boshlab bergandi. O‘zbekistonni O‘rta Osiyodagi eng zo‘r davlat qilish niyatini ham aytgan. Ko‘p o‘tmasdan “prezidentlik”dan “hokimlik” darajasiga tushib, Shavkat Mirziyoyevdan O‘zbekistondagi eng qoloq tuman hokimligi lavozimini so‘radi va uni boshqarib rivojlantirish xohishi borligini bildirdi.
“Ummon” guruhining sobiq qo‘shiqchilaridan biri darhol unga o‘rinbosarlik qilish istagini yozdi. Jahongir Otajonovning niyati jiddiy chiqib, “Xalq manfaatlari” nomli partiya tuzib ro‘yxatdan o‘tkazish uchun Adliya vazirligigacha bordi, ammo vazirlik qanday javob berganini bilmaymiz. Qizig‘i shundaki, “Xalq manfaatlari” degan nomdagi partiya avvaldan bor ekan.
Shoir va rejissor Ahad Qayum esa suhbatlardan birida o‘zini O‘rta Osiyodagi eng yaxshi prodyuser va rejissor, O‘zbekistondagi eng zo‘r aktyor deb hisoblashini aytib, hammaning og‘ziga tushdi. Bu shou-bizneschilarimizga aslo taraf yo‘qligidan yana bir bir dalolat beradi.
* * *
27-yanvar kuni prezident jami o‘nta vazirni ishdan olish bo‘yicha Bosh vazirga topshiriq berdi:
“Sadoqati bor, lekin aravani torta olmayotgani uchun ishdan olaman, eshitasizlar hali. Jonga tegdi bunaqa byurokratlar. Sekin-sekin bittadan viloyat hokimi, tuman hokimi, vazirlarni ham ishdan olib, o‘rniga yosh-yosh kadrlarni qo‘yaman. Qaysi vazir aravasini tortmayotganini bilaman. Bosh vazirga aytganman, o‘nta vazirni ishdan olishimiz kerak, deb. Ikkitasi ishdan olindi, lekin bu hali yetarli emas”, – degan prezident. Bu haqda O‘zA yozdi.
Shundan keyin Jismoniy tarbiya va sport vaziri Dilmurod Nabiyev lavozimidan ozod etildi va boshqa sohalardagi bir necha mas’ul lavozimdagilar ham almashtirildi.
* * *
30-yanvar mustaqil O‘zbekistonning birinchi prezidenti Islom Karimovning tug‘ilgan kuni. Islom Karimov hayot bo‘lganida 83 yoshga to‘lgan bo‘lardi. Garchi, oxirgi yillarda Islom Karimovning merosi xususidagi bir-biriga zid qarashlar aytilayotgan bo‘lsa-da, o‘tish davrida mamlakatga uzoq yillar rahbarlik qilgan bu siyosatchining faoliyatiga asl bahoni vaqt beradi, deb aytish mumkin. Shavkat Mirziyoyev prezident bo‘lganidan keyin Islom Karimov xotirasiga hurmat ko‘rsatishni an’anaga aylantirdi. Xususan, bu yil ham Samarqand va Qashqadaryoda Islom Karimov tavalludiga bag‘ishlangan xotira tadbirlari o‘tkazildi. Shavkat Mirziyoyev shu kuni Toshkent shahridagi Islom Karimov haykali poyiga gulchambar qo‘yib, uning xotirasiga hurmat bajo keltirdi. Qur’on oyatlari tilovat qilindi. Islom Karimovning ishlari va insoniy fazilatlari yodga olindi.
Islom Karimovning “O‘zbekistonda o‘ta boylar ham, o‘ta kambag‘allar ham bo‘lmaydi”, degan fikri uning ijtimoiy-iqtisodiy siyosatini tavsiflaydi, deyish mumkin. Shavkat Mirziyoyev prezident vazifasini vaqtincha egallaganda ham ushbu siyosatni davom ettirishini aytgandi. Islom Karimovning 1990—1992-yillardagi xos soqchilari boshlig‘i bo‘lgan Sa’dulla Muhamadqulov shu kunlarda uni xotirlab Islom Karimov kam ta’minlanganlar bilan ko‘p pul egalarining orasidagi masofani kamaytirish kerak, degani haqida gapirib berdi. Intervyuni to‘liq o‘qish va eshitish.
Biz ham “Daryo” nafaqat O‘zbekistonda, balki Markaziy Osiyodagi eng zo‘r sayt, deb hisoblaymiz. “Daryo”da qoling. Karantin qoidalariga rioya qilishni unutmang.
Izoh (0)