Qarshi tuman hokimining xizmat xonasida murojaatchi ayollarni “razbor” qilgani aytilgan ayol jurnalist ekani, shu harakati sabab ishdan bo‘shatilgani ma’lum qilindi

Qashqadaryo viloyatining Qarshi tumani hokimi Maqsuda Mustafoyevaning xizmat xonasida xayriya sifatida berilib, keyin olib qo‘yilgan 100 million so‘m haqida jamoatchilikni xabardor qilgan murojaatchi ayolni “razbor” qilgan Umida ismli ayol bloger emas, jurnalist ekani ma’lum qilindi. Bu haqda “Daryo” muxbiri xabar berdi.

Ta’kidlanishicha, bu haqda 29-yanvar, shanba kuni bo‘lib o‘tgan matbuot brifingida hokim yordamchisi Muqaddas Mirsaidova ma’lum qilgan.

“Mana shu voqealar ijtimoiy tarmoqlarda tarqalib ketganidan so‘ng o‘sha Umida ismli, biz bilan ilgari ham hamkorlikda ishlagan jurnalist ayol tumanimizga keldi va muammoga birgalashib ijobiy yechim topaylik dedi. Tahdid uchun emas, ijobiy yechim uchun. Mana shu ayollarning masalasini yechish uchun. Shuning uchun kelib, u ayollar bilan suhbat uyushtirdi. Mening aybim, hokim yordamchisi sifatidagi vakolatimdan foydalanib, hokim yo‘q paytda uning xizmat xonasiga ularni olib kirib, ikkita stulni ajratib berdim. Buni inkor etmayman, albatta”, — dedi hokim yordamchisi Musaddas Mirsaidova.

Hokim yordamchisi Mirsaidovaning gapi hokimlikning tashkiliy nazorat guruhi rahbari Nuriddin Qo‘ldoshevning “hokimlikka kelgan ayol bloger edi”, degan gapini inkor etdi.

Muqaddas Mirsaidovaga yuzlangan jurnalist va blogerlar hokimlikka kelib, murojaatchi ayollarni “razbor” qilgan va ayni kunda bo‘shatilayotgani aytilgan Umida ismli ayolning qaysi nashrda faoliyat yuritishini so‘radi. Biroq hokim yordamchisi Muqaddas Mirsaidova Maqsuda Mustafoyevaning qo‘l ishorasiga ko‘ra, jurnalist ayolning ish joyini ham oshkor qilmadi.

Eslatib o‘tamiz, avvalroq hokim Maqsuda Mustafoyeva yo‘q paytda uning xizmat xonasiga bemalol kirib, hattoki fuqarolarga bosim o‘tkazishga jur’at topgan ayol haqida xabar berilgandi. Qarshi tuman hokimligining tashkiliy nazorat guruhi rahbari Nuriddin Qo‘ldoshev murojaatchi ayollarga ruhiy bosim o‘tkazib, fuqaroni hokimning xizmat xonasida “razbor” qilishga jur’at topgan ayolning ismi Umida ekanligini oshkor qilgandi.