Shavkat Mirziyoyev har bir viloyatda “O‘zbekiston uchun 100 g‘oya” loyihasini amalga oshirish kerakligini ta’kidladi

Prezident Shavkat Mirziyoyev raisligida 27-yanvar, chorshanba kuni o‘tkazilgan yig‘ilishda davlat rahbari iqtidorli yoshlarni kashf qilish, ularning tashabbus va intilishlarini har tomonlama qo‘llab-quvvatlash maqsadida har bir viloyatda “O‘zbekiston uchun 100 g‘oya” loyihasini amalga oshirish zarurligini bildirdi, deya xabar bermoqda “Daryo” muxbiri.

“Loyiha doirasida yoshlarning iqtisodiyot, ta’lim, sog‘liqni saqlash kabi sohalar bo‘yicha innovatsion g‘oyalarini ro‘yobga chiqarish uchun zarur shart-sharoitlar yaratish lozim.

Misol uchun, qashqadaryolik yosh tadbirkor Sardor Sodiqov pandemiya tufayli barcha o‘quv markazlari o‘z faoliyatini to‘xtatgan bir paytda, ingliz tilini o‘rgatishning mobil dasturini yaratib, minglab yoshlar uchun masofaviy ta’limni yo‘lga qo‘ydi. Qolaversa, ushbu dasturni internet orqali xorijga ham eksport qilmoqda. Bunday innovatsion g‘oyalar menga juda ma’qul kelyapti.

Har bir viloyatdan 100 tadan g‘oya kelib tushsa, O‘zbekiston bo‘yicha jami 1 ming 400 ta g‘oya bo‘ladi. 100 tadan hech bo‘lmaganda 10 tasi iqtisodiy jihatdan barqaror bo‘lib, albatta, mamlakat iqtisodiyotiga tatbiq etiladi”, — dedi davlat rahbari.

Prezident bosh vazir o‘rinbosari Behzod Musayev, Yoshlar ishlari agentligi rahbari Alisher Sa’dullayev va viloyat hokimlariga bir oy muddatda qobiliyatli yoshlarni aniqlash, ularning ilg‘or g‘oyalarini qo‘llab-quvvatlashga qaratilgan tizim yaratish bo‘yicha topshiriq berdi.