San’atni tark etgan xonanda Jahongir Otajonov Instagram sahifasida folloverlariga yangi videomurojaat qoldirdi. Video “Inshaalloh, sizga O‘zbekistonning uchinchi prezidenti murojaat qilyapti”, deb nomlanadi. Xonanda ushbu videoda siyosatga qadam qo‘ymoqchi ekani hamda o‘zini davlat rahbari sifatida ko‘rayotganini aytib o‘tgan.

“Assalomu alaykum, aziz yurtdoshlar! Bugungi sizga murojaat qilishimga turtki bo‘lgan holat shuki, hozirgina ‘Daryo.uz’ saytida 2021-yilning mart oyidan O‘zbekistonda prezident saylovlariga tayyorgarlik boshlanadi, degan yangilikni o‘qib qoldim. Albatta, oldinlar ham ba’zi bir videolarimda bu haqda gapirib qo‘yardim, hazilga olib, lekin hech narsa o‘z-o‘zidan gapirilmaydi. Ochiqdan ochiq aytaman, Xudo xohlasa, mening ham prezident bo‘lish niyatim bor va, albatta, bo‘laman, deb umid qilaman. Zotan, Qur’oni Karimda kimki nimaga intilsa, shunga erishadi, deyilgan. Prezident bo‘lishdan maqsadim shuki, o‘zbek xalqiga, O‘zbekistonga halol, O‘zbekistonni rivojlantirish uchun xizmat qilish. Albatta, bu gapim bilan men hozirgi davlat rahbarlariga hech qanday e’tiroz bildirmoqchi emasman, bunga haqqim yo‘q. Ular ham o‘zining qo‘ldan kelgancha harakatini qilishyapti. Bir narsaga erishish, albatta, oson bo‘lmaydi. Hammasiga omad tilayman! Xudo xohlasa, yaqinda Toshkentga qaytaman, hozir oilam bilan chet eldaman, dam olishda. Aytmoqchi bo‘lganim, duo qilinglar, niyat qilinglar. Bu yilgi prezident saylovlariga qatnashish uchun nima qilish kerak bo‘lsa, harakatini qilaman. Partiya qilish kerak bo‘lsa, qilaman. Mobodo, bu safar ulgurmasam, keyingi safar, albatta, bo‘laman, inshaalloh, Allohdan omad tilanglar menga!”, — deydi Jahongir Otajonov.

Sobiq xonandaning ushbu murojaati muxlislari tomonidan turlicha talqin qilindi. Kimdir uning so‘zlarini hazilga yo‘ygan bo‘lsa, kimdir unga ovoz berishini aytib, xalqqa gaz va svet berishini so‘radi.

Foto: Instagram / @jahongir_otajonov

Foto: Instagram / @jahongir_otajonov

Foto: Instagram / @jahongir_otajonov

Foto: Instagram / @jahongir_otajonov

Foto: Instagram / @jahongir_otajonov