Қишнинг илиқ об-ҳавоси остида Аҳад Қаюмнинг узуқ-юлуқ видеолари муҳокамаси билан яна бир ҳафтани ўтказдик. Дайжестимиз хабарларида ҳам ҳафта об-ҳавоси сингари илиқлик йўқ эмас. Фалокатлар бўлмаса, нархлар жойида қолса, яширинча ёзилган бақир-чақирли аудиолар тарқалмаса – яхши ҳафта деганлари шу.
Коронавирус пандемияси чекловлари яна-да юмшатиляпти. 28 январдан концерт-томоша тадбирларини ташкил этишга рухсат берилди. Албатта, маълум шартлар асосида. Концерт саройларининг томошабин сиғимини инобатга олган ҳолда томошабинлар сонини 50 фоиздан оширмаган ҳолда ташкил этиш; концерт саройларининг томошабин ўриндиқларидан оралиқ масофани сақлаган ҳолда фойдаланилишини таъминлаш ва бу борада оралиқ масофани сақлаш учун талаб этиладиган ўриндиқларни консервация қилиш; концерт саройларига ташриф буюрувчи томошабин ҳамда хизмат кўрсатувчи ходимлар қатъий ниқобда бўлиш талаб қилинади. Бу чеклов ўтган йилнинг 15 мартида жорий қилинган, шундан кейин ҳамма концертлар Instagram’га кўчганди.
Шу куни кафе ва ресторанлар 23:00 гача ишлашига бўлган тақиқ ҳам олиб ташланди. Аввалроқ тўйхона, меҳмонхона, ресторан ҳамда кафеларда 30 кишидан кўп бўлган кўнгилочар тадбирларни коронавирусга ПЗР-тест ёки экспресс-тест текшируви асосида ташкил этилишига истисно тариқасида рухсат берилганди.
Аммо 30 январь куни Ўзбекистонда илк бор коронавируснинг «британча» штамми қайд этилди. Бу воқеани кутилмаган дейиш қийин, чунки бутун дунёга тарқалаётган британча вирус бизгача етиб келишига ажабланмаса ҳам бўлади (шунга қарамасдан, сайтимизнинг «энг кўп ўқилган» бўлимида турибди). «Британча» штаммни ўзбекистонлик фуқаро Дубайдан юқтириб келди. Айтилишича, беморнинг аҳволи қониқарли, шикояти йўқ. Янги турнинг ватани бўлган Буюк Британия бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ, лекин ундан хавфлироқ эмас.
* * *
Аҳолининг кўпроқ қисмини унча қизиқтирмаган, фақат айримларни қизиқтирган бир хабаримиз бор. Президент сайлови декабрда эмас, октябрда ўтказиладиган бўлди. Қонундаги бандлардан бири билан Президент, Қонунчилик палатаси, Қорақалпоғистон Жўрқорғи Кенгеси, шунингдек, вилоятлар, туманлар ва шаҳарлар давлат ҳокимияти вакиллик органлари учун ўтказиладиган сайловлар санаси декабрь ойининг учинчи ўн кунлигининг биринчи якшанбасидан октябрь ойининг учинчи ўн кунлигининг биринчи якшанбасига кўчирилди (2021 йилда ушбу сана 24 октябрга тўғри келмоқда).
Олий Мажлис Қонунчилик палатаси сайлов икки ой олдинга кўчирилишини кейинги сиёсий тадбирларни ўтказиш, жумладан, Давлат дастурини қабул қилиш ва бошқа ислоҳотларнинг кечиктирилишига сабаб бўлиши билан изоҳлади.
Шундай қилиб, электр ва газ муаммолари бошланган декабрь ойида эмас, айни пишиқчилик, ҳосиллар йиғиб-терилиб, тўйлар авж олган, аҳолимизнинг кайфияти соз бўлган октябрь ойида президент сайлаймиз. Сайловда фаол бўламиз, азиз ватандошлар.
* * *
Йигирма йилдан бери телеэкрандан тушмай келаётган энг умри узоқ интеллектуал ўйин «Заковат» яна давом этади. «Заковат» ўтган йиллар давомида учта телеканалда узатилди. Аммо яқинда намойиши тўхтаб қолганди. Шундан сўнг Комил Алламжонов ва Саида Мирзиёева «Заковат» лойиҳасини оталиғига олганди. Шу ҳафта Комил Алламжонов «Заковат» интеллектуал клуби нодавлат-нотижорат ташкилоти тузилиши ҳақида хабар қилди. Масс-медиа фонди Васийлик кенгаши раиси ўринбосари, Ўзбекистон Гендер тенглигини таъминлаш бўйича комиссияси аъзоси Саида Мирзиёева ҳам бу янгиликни улашди ва «...Хотин-қизларни бу ажойиб интеллектуал ўйинда фаол қатнашиб, ўз потенциалларини намойиш этишга чақирамиз», деб ёзди.
Айтиш лозимки, «Заковат» кўрсатуви орқали юзлаб ёшлар кашф қилинди. Уларнинг орасида катта муваффақиятга эришганлари кўп. Лойиҳа ўз вақтида билимдон ёшларни жалб этишнинг уддасидан чиққан ва ҳозир ҳам истиқболи бор.
* * *
Одатда, дайжестимизга «Шоу-бизнес» саҳифасидан хабар танламаймиз. Бироқ охирги вақтда шоу-бизнесчиларимиз фаоллигини ошириб шоу-бизнес форматида чиқиб, ҳаттоки, ижтимоий-сиёсий рукнларга ўтиб қоляпти. Буларнинг бири собиқ хонанда Жаҳонгир Отажоновдир.
Аввалроқ у президентликка номзодини қўймоқчилиги ҳақида гапириб, шов-шувни бошлаб берганди. Ўзбекистонни Ўрта Осиёдаги энг зўр давлат қилиш ниятини ҳам айтган. Кўп ўтмасдан «президентлик»дан «ҳокимлик» даражасига тушиб, Шавкат Мирзиёевдан Ўзбекистондаги энг қолоқ туман ҳокимлиги лавозимини сўради ва уни бошқариб ривожлантириш хоҳиши борлигини билдирди.
«Уммон» гуруҳининг собиқ қўшиқчиларидан бири дарҳол унга ўринбосарлик қилиш истагини ёзди. Жаҳонгир Отажоновнинг нияти жиддий чиқиб, «Халқ манфаатлари» номли партия тузиб рўйхатдан ўтказиш учун Адлия вазирлигигача борди, аммо вазирлик қандай жавоб берганини билмаймиз. Қизиғи шундаки, «Халқ манфаатлари» деган номдаги партия аввалдан бор экан.
Шоир ва режиссёр Аҳад Қаюм эса суҳбатлардан бирида ўзини Ўрта Осиёдаги энг яхши продюсер ва режиссёр, Ўзбекистондаги энг зўр актёр деб ҳисоблашини айтиб, ҳамманинг оғзига тушди. Бу шоу-бизнесчиларимизга асло тараф йўқлигидан яна бир бир далолат беради.
* * *
27 январь куни президент жами ўнта вазирни ишдан олиш бўйича Бош вазирга топшириқ берди:
«Садоқати бор, лекин аравани торта олмаётгани учун ишдан оламан, эшитасизлар ҳали. Жонга тегди бунақа бюрократлар. Секин-секин биттадан вилоят ҳокими, туман ҳокими, вазирларни ҳам ишдан олиб, ўрнига ёш-ёш кадрларни қўяман. Қайси вазир аравасини тортмаётганини биламан. Бош вазирга айтганман, ўнта вазирни ишдан олишимиз керак, деб. Иккитаси ишдан олинди, лекин бу ҳали етарли эмас», – деган президент. Бу ҳақда ЎзА ёзди.
Шундан кейин Жисмоний тарбия ва спорт вазири Дилмурод Набиев лавозимидан озод этилди ва бошқа соҳалардаги бир неча масъул лавозимдагилар ҳам алмаштирилди.
* * *
30 январь мустақил Ўзбекистоннинг биринчи президенти Ислом Каримовнинг туғилган куни. Ислом Каримов ҳаёт бўлганида 83 ёшга тўлган бўларди. Гарчи, охирги йилларда Ислом Каримовнинг мероси хусусидаги бир-бирига зид қарашлар айтилаётган бўлса-да, ўтиш даврида мамлакатга узоқ йиллар раҳбарлик қилган бу сиёсатчининг фаолиятига асл баҳони вақт беради, деб айтиш мумкин. Шавкат Мирзиёев президент бўлганидан кейин Ислом Каримов хотирасига ҳурмат кўрсатишни анъанага айлантирди. Хусусан, бу йил ҳам Самарқанд ва Қашқадарёда Ислом Каримов таваллудига бағишланган хотира тадбирлари ўтказилди. Шавкат Мирзиёев шу куни Тошкент шаҳридаги Ислом Каримов ҳайкали пойига гулчамбар қўйиб, унинг хотирасига ҳурмат бажо келтирди. Қуръон оятлари тиловат қилинди. Ислом Каримовнинг ишлари ва инсоний фазилатлари ёдга олинди.
Ислом Каримовнинг «Ўзбекистонда ўта бойлар ҳам, ўта камбағаллар ҳам бўлмайди», деган фикри унинг ижтимоий-иқтисодий сиёсатини тавсифлайди, дейиш мумкин. Шавкат Мирзиёев президент вазифасини вақтинча эгаллаганда ҳам ушбу сиёсатни давом эттиришини айтганди. Ислом Каримовнинг 1990—1992 йиллардаги хос соқчилари бошлиғи бўлган Саъдулла Муҳамадқулов шу кунларда уни хотирлаб Ислом Каримов кам таъминланганлар билан кўп пул эгаларининг орасидаги масофани камайтириш керак, дегани ҳақида гапириб берди. Интервьюни тўлиқ ўқиш ва эшитиш.
Биз ҳам «Дарё» нафақат Ўзбекистонда, балки Марказий Осиёдаги энг зўр сайт, деб ҳисоблаймиз. «Дарё»да қолинг. Карантин қоидаларига риоя қилишни унутманг.
Изоҳ (0)