Moskva hukumati taksi haydovchilari va kuryerlar uchun COVID-19’ga qarshi vaksinatsiyani tashkil qilishga tayyor. Bu haqda shahar merining transport bo‘yicha o‘rinbosari Maksim Liksutovning so‘zlariga tayanib “Kommersant” xabar berdi.
“Biz nafaqat Yandex, balki barcha taksi kompaniyalarining haydovchilari uchun vaksinatsiya tashkil qilishga tayyormiz. Avvalo Rossiya fuqarolari vaksina olish imkoniyatiga ega bo‘ladi. Barcha kompaniyalarga, shuningdek, turli xil yetkazib berish xizmatlarining kuryerlariga vaksinatsiyani taklif qilamiz ”, — dedi Liksutov.
Shahar merining o‘rinbosari taksi xodimlari juda ko‘p odamlar bilan o‘zaro aloqada bo‘lishi va emlash virus tarqalishining oldini olishga yordam berishini ta’kidladi. Vaksinatsiya markazlarining manzillari keyinroq e’lon qilinadi.
Rossiyada 3-noyabrdan beri ilk bor 26-yanvar kuni koronavirus yuqtirganlar soni 19 mingdan kam qayd etildi. Pandemiya boshlanganidan beri virusga chalinganlarning umumiy soni 3,76 million nafarga yetdi.
Mamlakatda 18-yanvardan COVID-19’ga qarshi ommaviy emlash boshlangandi. Shuningdek, Gallup International tomonidan o‘tkazilgan tadqiqotga ko‘ra, rossiyaliklar sayyoramizning vaksinaga nihoyatda shubha bilan qaraydigan aholisidan biridir.
Avvalroq rossiyaliklarning yarmidan ko‘pi koronavirusga qarshi “Sputnik V” vaksinasi bilan emlanishni xohlamayotgan edi hamda Moskva meri koronavirusdan tuzalganlar uchun cheklovlarni yumshatishga va’da bergandi.
Izoh (0)