Amsterdamdagi tartibsizlik paytida portlashlar yuz berdi

Karantin cheklovlari tufayli ketma-ket to‘rtinchi kun tartibsizliklar davom etayotgan Amsterdamda bir nechta portlash yuz berdi, deb yozmoqda “RBK”.

Portlashlar Niderlandiya poytaxti chetidagi Osdorp hududida sodir bo‘lgan. Portlashlarning biri namoyishchilar tomonidan yoqib yuborilgan yuk mashinasida, boshqasi savdo do‘konida yuz bergan.

Tartibsizliklar paytida politsiya bilan to‘qnashuvlar sodir bo‘lgan. Ayni paytda, komendantlik soati boshlanib, hudud qamal qilingan; u yerda norozilik harakati deyarli to‘xtagan. Ta’kidlanishicha, namoyishchilarning so‘nggi guruhlari xavfsizlik kuchlari tomonidan o‘rab olingan ovqatlanish shoxobchasini boshpana qilgan.

Milliy politsiya boshlig‘i Uilyam Velenning so‘zlariga ko‘ra, 26-yanvarda tun avvalgi kunlarga qaraganda “ancha osoyishta” o‘tgan. U ijtimoiy tarmoqlarda ko‘chaga chiqishga bo‘lgan chaqiriqlar haliyam ko‘pligini ta’kidlagan.

Eslatib o‘tamiz, Niderlandiya 23-yanvardan butun mamlakat bo‘ylab 21:00 dan 04:30 gacha amal qiladigan komendantlik soati o‘rnatilib, u 10-fevralgacha davom etishi belgilangach tartibsizliklar boshlangan edi.

Bir nechta shaharlarda politsiya namoyishchilarga qarshi dubinkalar, ko‘zni yoshlantiruvchi gaz va suv zambaraklaridan foydalanishga majbur bo‘lgan hamda rasmiylar talonchilik holatlari haqida ham xabar bergan.

25-yanvar kuni namoyishchilar avtomobil, piyodalar ko‘priklarini yoqib, do‘kon va muassasalarning oynalarini sindira boshlagan. Politsiya bilan to‘qnashuv paytida namoyishchilar politsiya xodimlariga tosh va feyerverklar uloqtirgan. O‘nlab namoyishchilar hibsga olinib, jarimaga tortilgan.

Avvalroq Livanda lokdaunga qarshi namoyishchilarning huquq-tartibot organlari xodimlari bilan to‘qnashuvi sodir bo‘lgani, besh nafar namoyishchi va uch nafar ichki xavfsizlik xodimi jarohat olib, o‘nlab odamlar hibsga olingani haqida xabar qilingandi.