Москва ҳукумати такси ҳайдовчилари ва курьерлар учун COVID-19’га қарши вакцинацияни ташкил қилишга тайёр. Бу ҳақда шаҳар мэрининг транспорт бўйича ўринбосари Максим Ликсутовнинг сўзларига таяниб «Коммерсантъ» хабар берди.
Аввалроқ Yandex компанияси пойтахт ҳукуматига такси ҳайдовчилари ва курьерларни мажбурий тиббий суғуртаси ва Россия фуқаролиги бор-йўқлигидан қатъи назар, коронавирусга қарши эмлашни сўраб мурожаат қилган.
«Биз нафақат Yandex, балки барча такси компанияларининг ҳайдовчилари учун вакцинация ташкил қилишга тайёрмиз. Аввало Россия фуқаролари вакцина олиш имкониятига эга бўлади. Барча компанияларга, шунингдек, турли хил етказиб бериш хизматларининг курьерларига вакцинацияни таклиф қиламиз », — деди Ликсутов.
Шаҳар мэрининг ўринбосари такси ходимлари жуда кўп одамлар билан ўзаро алоқада бўлиши ва эмлаш вирус тарқалишининг олдини олишга ёрдам беришини таъкидлади. Вакцинация марказларининг манзиллари кейинроқ эълон қилинади.
Россияда 3 ноябрдан бери илк бор 26 январь куни коронавирус юқтирганлар сони 19 мингдан кам қайд этилди. Пандемия бошланганидан бери вирусга чалинганларнинг умумий сони 3,76 миллион нафарга етди.
Мамлакатда 18 январдан COVID-19’га қарши оммавий эмлаш бошланганди. Шунингдек, Gallup International томонидан ўтказилган тадқиқотга кўра, россияликлар сайёрамизнинг вакцинага ниҳоятда шубҳа билан қарайдиган аҳолисидан биридир.
Аввалроқ россияликларнинг ярмидан кўпи коронавирусга қарши «Спутник V» вакцинаси билан эмланишни хоҳламаётган эди ҳамда Москва мэри коронавирусдан тузалганлар учун чекловларни юмшатишга ваъда берганди.
Изоҳ (0)