Rossiya aholisining yarmidan ko‘prog‘i (58 foizi) Rossiyaning “Sputnik V” vaksinasi bilan koronavirusga qarshi emlanishga tayyor emas, yana 38 foizi esa, aksincha, bunga tayyor. Bu haqda “Levada-markaz” o‘tkazgan so‘rov natijalariga tayanib, Meduza xabar bermoqda.

Foto: “RIA Novosti”

Bu ma’lumotlarni “Levada-markaz” tomonidan so‘nggi to‘rt oy mobaynida o‘tkazilgan shunga o‘xshash so‘rovlar yakunlariga qiyoslash mumkin. Masalan, avgustda respondentlarning 54 foizi bu vaksinani olishga tayyor emasliklarini bildirgan bo‘lsa, 38 foizi emlanishga shayligini ma’lum qilgan edi. Oktabrda esa shu ikki xil fikrni bildirganlar ulushi tegishli ravishda 59 va 36 foiz bo‘lgan.

Yangi so‘rov natijalariga qaraganda, emlanishga tayyor bo‘lmaganlarning 30 foizi vaksina sinovlarining yakunlanishini kutmoqchi, taxminan yana shuncha odam (29 foiz) ikkilamchi ta’sirlardan xavfsiramoqda, 12 foiz odamga esa vaksina tibbiy jihatdan to‘g‘ri kelmaydi. Respondentlarning yana 12 foizi koronavirusdan emlanish qandaydir foyda berishiga shubha qiladi, 10 foizi — umuman har qanday vaksinalarga qarshi chiqadi. 6 foiz odam boshqa variantlarni tanlagan, 1 foizi esa javob berishga qiynalgan.

“Levada-markaz” so‘rovi ma’lumotlariga ko‘ra, so‘rov qatnashchilarining 57 foizi koronavirusga chalinishdan qo‘rqadi, 41 foizi, aksincha, bundan qo‘rqmaydi. Bu ham avvalgi so‘rov yakunlariga juda o‘xshash. Chunonchi, iyulda 49 foiz odam COVID-19’dan qo‘rqishini bildirgan, yana shuncha qismi bundan hayiqmasligini qayd etgan.

Eslatib o‘tamiz, 2-dekabrda Putin Rossiyada koronavirusga qarshi keng ko‘lamli emlashni boshlashni buyurgandi. Moskvada emlash markazlari 5-dekabrdan ish boshladi, 17-dekabrga qadar, Moskva meri Sergey Sobyaninning so‘zlariga ko‘ra, 15 mingga yaqin kishi emlandi. Sergey Sobyanin shahar aholisining 7 million nafari COVID-19’ga qarshi emlanishi kerakligini aytgandi.

Vaksinani qabul qilish imkoniyatiga dastlab ta’lim, sog‘liqni saqlash va ijtimoiy soha xodimlari ega bo‘lgandi. 14-dekabrdan COVID-19’ga qarshi vaksina olishi mumkin bo‘lganlar ro‘yxati kengaytirildi.

Dekabr oyi o‘rtalarida Rossiyaning barcha hududlarida koronavirusga qarshi emlash boshlandi.

Rossiyada ikkita vaksina ro‘yxatdan o‘tkazilgan: Gamaleya markazi tomonidan ishlab chiqilgan “Sputnik V” va Novosibirskning “Vektor” markazi tomonidan yaratilgan “EpiVakKorona”. Har ikkala preparat uchinchi sinov bosqichida va u hali davom etmoqda. “Sputnik V” ishlab chiqaruvchilar uning 95 foiz samaradorligini ma’lum qilgan.