AQSh Afg‘oniston va Iroqdagi qo‘shinlari sonini oshirishi mumkin

AQShning yangi mudofaa vaziri Lloyd Ostin sobiq prezident Donald Trampning Afg‘oniston va Iroqda qo‘shinlarni kamaytirish qaroridan keyin u yerdagi qo‘shinlar sonini qayta ko‘rib chiqishi mumkin, deb yozadi “Kommersant” The Wall Street Journal’ga tayanib. Nashr manbalariga ko‘ra, Ostin AQShning ikki ziddiyatdagi strategik rolini baholashni rejalashtirmoqda.

Shu bilan birga, Pentagon vakili Jon Kirbi ma’lum qilishicha, Afg‘oniston va Iroqdagi qo‘shinlar sonini qayta ko‘rib chiqish haqida rasmiy qaror qabul qilinganicha yo‘q. Uning ta’kidlashicha, prezident Jo Baydenning ma’muriyati har ikkala mamlakatdagi operatsiyalar maqomini yaxshilab tushunib olishni va ushbu missiyalar uchun foydalaniladigan resurslarni baholashni istaydi.

“Bizning Amerika xalqini terrorizm xavfidan himoya qilish istagimiz borasida hech narsa o‘zgargani yo‘q, ammo biz strategiyamizni resurslar bilan tegishlicha ta’minlayotganimizga ishonch hosil qilishimiz kerak”, — dedi Kirbi. Uning so‘zlariga ko‘ra, qo‘shinlar soni haqidagi qaror Iroq va Afg‘oniston hukumatlari bilan maslahatlashuvlardan keyin qabul qilinadi.

2020-yil noyabrida AQSh Afg‘oniston va Iroqda 2,5 ming nafardan harbiyni qoldirishini ma’lum qilgan edi. Qo‘shinlar 15-yanvargacha olib chiqib ketildi. Afg‘onistondan 2 ming, Iroqdan 500 kishi chiqarib yuborilishi aytilgan edi. Trampning rejasiga ko‘ra, Iroq va Afg‘onistondan qo‘shinlar 2021-yil maygacha qaytarilishi kerak edi.

2021-yil yanvarida esa Afg‘oniston va Iroqdagi amerikalik harbiylar soni har bir mamlakatda 2,5 minggacha kamaygani xabar berildi.