Moskvaning “Lokomotiv” klubi bilan shartnomani bekor qilgan Jasur Jaloliddinovning agentlari unga RPLdan klub qidirmoqda.
Jurnalist va insayder Sergey Yegorovning xabar qilishicha, futbolchining agentlari hech qanday badal pullarini talab qilmagan holda Jasurni RPL klublariga tekinga taklif qilmoqda.
Avvalroq agentlar Jaloliddinovning “Bunyodkor”dan “Lokomotiv”ga o‘tishidan 850 ming yevro ishlab olgani ma’lum bo‘lgandi.
Xabarda ta’kidlanishicha, “Lokomotiv” o‘zbekistonlik futbolchi uchun kamida 980 ming yevro xarajat qilgan. Bu miqdorga shartnomani bekor qilishda to‘langan kompensatsiya hisobga olinmagan.
18 yoshli futbolchining agenti Yuriy Belous Jasur borasida arab, markaziy Yevropa va Ispaniya Segundasi klublaridan qator takliflar borligini ma’lum qilmoqda.
Jaloliddinov 2020-yilning iyul oyida “Lokomotiv” futbolchisiga aylandi. Biroq moskvaliklar yarim himoyachini Rossiya Premyer Ligasi ro‘yxatidan chiqarib yubordi va Jasur “Tambov”ga ijaraga berildi. Biroq 18 yoshli o‘yinchi “Tambov” safida ham birorta o‘yin o‘tkazmadi.
Jasur Jaloliddinov — 2002-yil 15-mayda Navoiyda tug‘ilgan. 2018-yil 2-avgust sanasida “Bunyodkor” safida Superliga doirasida debyut o‘yinini “Qo‘qon-1912”ga qarshi o‘tkazgan. U debyut qilgan vaqtda 16 yosh 80 kunlik edi. Bu orqali u O‘zbekiston chempionatida maydonga tushgan eng yosh futbolchiga aylangandi. 2019-yil oktabrida The Guardian talqiniga ko‘ra, dunyoning eng iste’dodli 60 futbolchisi ro‘yxatida qayd etilgan. 2019-yil yakunlariga ko‘ra, Superliganing eng yaxshi o‘yinchisi deb topilgan. 2019-yil dekabrida Italiyaning “Benevento” klubi ko‘rigida bo‘lgan.
Izoh (0)