Moskvaning “Lokomotiv” klubi yarim himoyachisi Jasur Jaloliddinov “temiryo‘lchilar” safini tark etdi.

Foto: Eurosport

“Lokomotiv” matbuot xizmatining ma’lum qilishicha, tomonlar o‘zaro kelishgan holda shartnomani bekor qilgan.

Jaloliddinov iyul oyida “Lokomotiv” futbolchisiga aylandi. Biroq moskvaliklar yarim himoyachini Rossiya Premyer Ligasi ro‘yxatidan chiqarib yubordi va Jasur “Tambov”ga ijaraga berildi. Biroq 18 yoshli o‘yinchi “Tambov” safida ham birorta o‘yin o‘tkazmadi.

Eslatib o‘tamiz, 2020-yil iyul oyida “Bunyodkor”ning o‘sha vaqtdagi direktori Ulug‘bek Mirzayev Jasur Jaloliddinov 350 ming yevro evaziga Moskvaning “Lokomotiv” klubiga o‘tayotganini tasdiqlagandi. Orada “Chempionat” nashri “Lokomotiv” Jaloliddinov uchun 1 million yevro sarflashini, mablag‘ning 100 ming yevrosi futbolchining “Bunyodkor” bilan amaldagi shartnomasini bekor qilishga, qolgan 900 ming yevro esa Jasurning agentlariga nasib etishi haqida ma’lum qildi. 29-iyul kuni esa moskvaliklar Jasurning transferini e’lon qildi. Avgust oyi avvalida “Bunyodkor” direktori Ulug‘bek Mirzayev ishdan ketgani aytildi. Shundan so‘ng avgust oyida Professional futbol ligasi Jasur Jaloliddinov transferida shubhali jihatlar borligini e’lon qilib, O‘zbekiston futbol assotsiatsiyasiga murojaat qilgani aytildi. Ushbu murojaat natijalari tashkilot rasmiy saytlarida e’lon qilinmadi. Keyinchalik, futbolchi “Bunyodkor” bilan shartnomani bekor qilgani va buning uchun 130 ming yevro to‘langani, futbolchining agentlari esa transferdan 850 ming yevro ishlab olgani ma’lum bo‘ldi.

Jasur Jaloliddinov — 2002-yil 15-mayda Navoiyda tug‘ilgan. 2018-yil 2-avgust sanasida “Bunyodkor” safida Superliga doirasida debyut o‘yinini “Qo‘qon-1912”ga qarshi o‘tkazgan. U debyut qilgan vaqtda 16 yosh 80 kunlik edi. Bu orqali u O‘zbekiston chempionatida maydonga tushgan eng yosh futbolchiga aylangandi. 2019-yil oktabrida The Guardian talqiniga ko‘ra, dunyoning eng iste’dodli 60 futbolchisi ro‘yxatida qayd etilgan. 2019-yil yakunlariga ko‘ra, Superliganing eng yaxshi o‘yinchisi deb topilgan. 2019-yil dekabrida Italiyaning “Benevento” klubi ko‘rigida bo‘lgan.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!