Москванинг «Локомотив» клуби билан шартномани бекор қилган Жасур Жалолиддиновнинг агентлари унга РПЛдан клуб қидирмоқда.
Журналист ва инсайдер Сергей Егоровнинг хабар қилишича, футболчининг агентлари ҳеч қандай бадал пулларини талаб қилмаган ҳолда Жасурни РПЛ клубларига текинга таклиф қилмоқда.
Аввалроқ агентлар Жалолиддиновнинг «Бунёдкор»дан «Локомотив»га ўтишидан 850 минг евро ишлаб олгани маълум бўлганди.
Хабарда таъкидланишича, «Локомотив» ўзбекистонлик футболчи учун камида 980 минг евро харажат қилган. Бу миқдорга шартномани бекор қилишда тўланган компенсация ҳисобга олинмаган.
18 ёшли футболчининг агенти Юрий Белоус Жасур борасида араб, марказий Европа ва Испания Сегундаси клубларидан қатор таклифлар борлигини маълум қилмоқда.
Жалолиддинов 2020 йилнинг июль ойида «Локомотив» футболчисига айланди. Бироқ москваликлар ярим ҳимоячини Россия Премьер Лигаси рўйхатидан чиқариб юборди ва Жасур «Тамбов»га ижарага берилди. Бироқ 18 ёшли ўйинчи «Тамбов» сафида ҳам бирорта ўйин ўтказмади.
Жасур Жалолиддинов — 2002 йил 15 майда Навоийда туғилган. 2018 йил 2 август санасида «Бунёдкор» сафида Суперлига доирасида дебют ўйинини «Қўқон-1912»га қарши ўтказган. У дебют қилган вақтда 16 ёш 80 кунлик эди. Бу орқали у Ўзбекистон чемпионатида майдонга тушган энг ёш футболчига айланганди. 2019 йил октябрида The Guardian талқинига кўра, дунёнинг энг истеъдодли 60 футболчиси рўйхатида қайд этилган. 2019 йил якунларига кўра, Суперлиганинг энг яхши ўйинчиси деб топилган. 2019 йил декабрида Италиянинг «Беневенто» клуби кўригида бўлган.
Изоҳ (0)