Britaniya hukumati o‘zini o‘zi izolyatsiya qilgan fuqarolarga pul to‘lashi mumkin

Buyuk Britaniya hukumati koronavirusga chalingan fuqarolar uyda qolishi uchun pul to‘lashni taklif qilmoqda, deya xabar qilmoqda “Interfaks”.

Qayd etilishicha, ko‘pchilik o‘zini izolyatsiya qilish qoidalariga rioya qilishni va COVID-testdan o‘tishni xohlamagani sababli bu taklif berilgan.

Rasmiylar tomonidan tayyorlangan ushbu reja hali tasdiqlanmagan. Koronavirusga chalinib, uyda qolgan fuqaroga 500 funt sterling (685 dollar) miqdorida to‘lov amalga oshirish hujjat loyihasida ko‘zda tutilgan.

Hujjatda aytilishicha, oyiga taxminan 2 milliard funt sterling sarflanadigan ushbu taklif o‘zini izolyatsiya qilish vaqtida daromadini yo‘qotishidan qo‘rqqanlar uchun mo‘ljallangan.

Ma’lumot uchun, Buyuk Britaniyada yangi shtamm sabab uchinchi marotaba lokdaun e’lon qilingan. Shundan so‘ng London meri koronavirus tufayli shaharda favqulodda holat e’lon qildi. Londonda koronavirusga chalinish holatlari ko‘payib, tibbiyot xodimlari yetishmovchiligi kuzatilayotgani bois politsiya va o‘t o‘chiruvchilar tez tibbiy yordam mashinalarini haydashga jalb qilingan.

Buyuk Britaniya bosh vaziri Boris Jonson karantin yozgacha davom etishi mumkinligiga ishora qildi.

Buyuk Britaniyada do‘konlar, restoranlar va o‘quv muassasalari yopiq, fuqarolardan o‘ta zarurat bo‘lmasa uylaridan chiqmaslik so‘ralmoqda. Ta’kidlanishicha, cheklovlar so‘nggi uch asrdagi eng yomon tanazzulni boshdan kechirgan iqtisodiyot uchun yana bir tahdidni yuzaga keltirmoqda.

Mamlakatda so‘nggi ma’lumotlarga ko‘ra, pandemiya boshlangandan beri 3 553 802 odamda koronavirus aniqlangan. Bemorlarning 94 765 nafari vafot etgan.