AQShning yangi prezidenti Jo Bayden Oq uyga ko‘chib o‘tib, Oval xonani o‘ziga moslab o‘zgartirdi, deya xabar qilmoqda Meduza.
Qayd etilishicha, Bayden stol ostiga Bill Klinton davrida bo‘lgan to‘q ko‘k gilamni to‘shadi, Benjamin Franklin portretini devorga osib qo‘ydi. Shuningdek, o‘ziga yaqin joyga huquq himoyachisi Sesar Chaves va AQShning 33-prezidenti Garri Trumenning byustlarini o‘rnatdi hamda o‘zining oilaviy fotosuratlarini joylashtirdi.
Shu bilan birga, Bayden avvalgi prezident Donald Tramp uchun maxsus o‘rnatilgan qizil tugmachani stoldan olib tashladi.
Ushbu tugma yadroviy raketalarni uchirish yoki Twitter’da shoshilinch biror narsa yozish uchun kerak bo‘lmagan. Tramp tugmachani har bosganida idora xodimi sobiq prezidentning eng sevimli ichimligi bo‘lgan Diet Coke bilan Oval xonaga kirib kelgan.
Tugmaning yo‘qligini jurnalist Tom Nyuton Dann payqadi. U 2019-yilda intervyu paytida Tramp tugmachani bosganini va ko‘p o‘tmay xonada Diet Coke ichimligi bilan bir kishi paydo bo‘lganini esladi.
Tramp qizil tugmachasini necha marta ishlatgan deb o‘ylaysiz? U bu tugmachadan kuniga 10 martadan ortiq foydalangan. 2018-yilda The New York Times yozishicha, o‘sha paytdagi prezident kuniga 12 stakan Diet Coke ichgan, shu bilan birga, ichimlik olib kelgan xodimlar bilan televizorda ko‘rgan yangiliklari haqidagi fikrlari bilan bo‘lishgan.
Avvalroq Bayden Trampning iqlim bo‘yicha Parij bitimi va JSSTdan chiqish to‘g‘risidagi qarorlarini bekor qilgani, razvedkaga Navalniyning zaharlanishi va AQShga uyushtirilgan kiberhujumni o‘rganish topshirig‘ini bergani hamda Trampning boshqa eng bahsli farmonlarini bekor qilgani haqida xabar berilgandi.
Izoh (0)