Британия ҳукумати ўзини ўзи изоляция қилган фуқароларга пул тўлаши мумкин

Буюк Британия ҳукумати коронавирусга чалинган фуқаролар уйда қолиши учун пул тўлашни таклиф қилмоқда, дея хабар қилмоқда «Интерфакс».

Қайд этилишича, кўпчилик ўзини изоляция қилиш қоидаларига риоя қилишни ва COVID-тестдан ўтишни хоҳламагани сабабли бу таклиф берилган.

Расмийлар томонидан тайёрланган ушбу режа ҳали тасдиқланмаган. Коронавирусга чалиниб, уйда қолган фуқарога 500 фунт стерлинг (685 доллар) миқдорида тўлов амалга ошириш ҳужжат лойиҳасида кўзда тутилган.

Ҳужжатда айтилишича, ойига тахминан 2 миллиард фунт стерлинг сарфланадиган ушбу таклиф ўзини изоляция қилиш вақтида даромадини йўқотишидан қўрққанлар учун мўлжалланган.

Маълумот учун, Буюк Британияда янги штамм сабаб учинчи маротаба локдаун эълон қилинган. Шундан сўнг Лондон мэри коронавирус туфайли шаҳарда фавқулодда ҳолат эълон қилди. Лондонда коронавирусга чалиниш ҳолатлари кўпайиб, тиббиёт ходимлари етишмовчилиги кузатилаётгани боис полиция ва ўт ўчирувчилар тез тиббий ёрдам машиналарини ҳайдашга жалб қилинган.

Буюк Британия бош вазири Борис Жонсон карантин ёзгача давом этиши мумкинлигига ишора қилди.

Буюк Британияда дўконлар, ресторанлар ва ўқув муассасалари ёпиқ, фуқаролардан ўта зарурат бўлмаса уйларидан чиқмаслик сўралмоқда. Таъкидланишича, чекловлар сўнгги уч асрдаги энг ёмон таназзулни бошдан кечирган иқтисодиёт учун яна бир таҳдидни юзага келтирмоқда.

Мамлакатда сўнгги маълумотларга кўра, пандемия бошлангандан бери 3 553 802 одамда коронавирус аниқланган. Беморларнинг 94 765 нафари вафот этган.