Interpol Bayrut portidagi portlash bo‘yicha 2 nafar rossiyalikka qidiruv e’lon qilgandi. Rossiya ushbu ikki rossiyalikni hibsga olmaydi va boshqa davlatga ekstraditsiya qilmaydi. Bu haqda Rossiya Bosh prokuraturasiga tayanib, “RIA Novosti” xabar qildi.
Gap selitra yetkazib berilgan kema kapitani Boris Prokoshev hamda kemaning xo‘jayini Igor Grechushkin haqida bormoqda.
“Grechushkin va Prokoshevga nisbatan ekstraditsiya qilish va huquqiy yordam berish to‘g‘risida xorijiy davlatlarning vakolatli organlaridan hech qanday so‘rovlar bo‘lmagan. Grechushkin va Prokoshev Rossiya fuqarolari ekanligini hisobga olsak, ularni boshqa davlatga topshirish mumkin emas”, – deyiladi Bosh prokuratura xabarida.
Livan Bosh prokuraturasi Prokoshev va Grechushkinni xalqaro qidiruv to‘g‘risida Interpolga murojaat qilgan. Grechushkin va Prokoshev 2020-yil oktabridayoq Livanda sirtdan hibsga olingan edi.
Prokoshev va Grechushkinga nisbatan Interpolning “qizil xabarnomasi” amalda. Bu shuni anglatadiki, Interpolga a’zo davlatlar qidiruvga kirishishlari shart emas, ammo qidiruvda bo‘lgan shaxslarning qayerdaligi ma’lum bo‘lsa, ular hibsga olinishi kerak.
Eslatib o‘tamiz, Livan poytaxti Bayrut shahridagi portda 2020-yilning 4-avgust kuni ammiak selitrasi saqlanayotgan ombor portlagandi. Portlash kuchi shu darajada bo‘ldiki, uning oqibatida butun shahardagi binolar zarar ko‘rdi, 190 kishi halok bo‘ldi, 300 mingdan ortiq odam uysiz qoldi.
Mamlakat rasmiylari portlash oqibatida yuzaga kelgan umumiy zararni 3-5 milliard dollarga baholadi. Hodisa sababli mamlakat hukumati iste’foga chiqdi. Portlashga olti yil avval bojxona xizmati tomonidan musodara qilingan va portdagi omborda saqlanayotgan 2750 tonna ammiak selitrasi sabab bo‘lgan.
Izoh (0)