15-yanvar kuni Xalq deputatlari Nurafshon shahar Kengashining navbatdan tashqari 24-sessiyasisi boshlandi. Sessiya ishida viloyat sektor rahbarlari, deputatlar, shahar faollari ishtirok etmoqda, deb xabar beradi Toshkent viloyati hokimligi axborot xizmati.
Sessiya kun tartibiga tashkiliy masala kiritilgan. Kun tartibidagi masala yuzasidan viloyat hokimi Rustam Xolmatov nutq so‘zlagan.
“Viloyat hokimi Nurafshonni zamonaviy shaharsozlik an’analariga muvofiq barpo etish ishlari sust ketayotganiga e’tibor qaratdi. Shuningdek, shaharni ijtimoiy-iqtisodiy rivojlantirish bo‘yicha yo‘l qo‘yilgan xato-kamchiliklar tanqidiy tahlil qilindi”, — deyiladi xabarda.
Ta’kidlanishicha, Rustam Xolmatov Nurafshon shahri hokimi lavozimiga Muzaffar Soliyev nomzodini tavsiya etgan. Sessiya kun tartibiga qo‘yilgan masala yuzasidan muhokamalardan so‘ng, Muzaffar Soliyev Nurafshon shahri hokimi etib tayinlangan.
Sessiya ishida, shuningdek, Nurafshon shahri hokimining kapital qurilish va kommunikatsiya masalalari bo‘yicha o‘rinbosari boshqa ishga o‘tgani munosabati bilan ushbu lavozimga Sherzod Usmonov tayinlangan.
Avvalroq uy-joy kommunal xizmat ko‘rsatish vaziri sifatida ishlab kelgan Muzaffar Soliyev “faoliyatida yo‘l qo‘ygan kamchiliklar, qayta-qayta ogohlantirishlarga qaramay tegishli xulosa chiqarmagani uchun” egallab turgan lavozimidan ozod qilingandi.
2019-yildan buyon Nurafshon hokimi lavozimida ishlab kelgan Qahramon Hakimov 14-yanvar kuni egallab turgan lavozimidan olingan edi.
Izoh (0)