Samarqand viloyat bolalar ko‘p tarmoqli tibbiyot markaziga sun’iy buyrak muammolarini bartaraf etish maqsadida 748 million 500 ming so‘mga 5 ta gemodializ apparati olib kelindi. Shuningdek, viloyat sog‘liqni saqlash boshqarmasi mablag‘lari hisobidan 749 million so‘m evaziga ikkita suv nososi ham keltirildi. Bu haqda “Daryo” muxbiri Farhod Norbo‘tayev xabar berdi.
“Viloyatimizda hozirgi vaqtda buyrakning surunkali kasalliklari oqibatida surunkali buyrak yetishmovchiligi bilan 41 nafar bemor bolalar nazoratda turadi. Bu bemorlar doimiy ravishda dializ muolajalari o‘tkazilishiga muhtoj hisoblanadi. Markazimizning bolalar kardioxirurgiyasi bo‘limida yil davomida o‘rtacha 250-350 nafar bolada yurakda ochiq turdagi operatsiyalar amalga oshiriladi. Bu bemorlarning 10 foizi og‘ir yurak tug‘ma nuqsonlari bo‘lib, operatsiyadan keyingi davrda gemodializ xizmatiga muhtoj bo‘lishi mumkin. Bundan tashqari, 2019-yil davomida 10 nafar, 2020-yilda esa 2 nafar bemorni o‘tkir buyrak yetishmovchiligi tashxisi bilan gemodializ o‘tkazish uchun Toshkent shahriga yuborishga majbur bo‘ldik”, — deydi Samarqand viloyat bolalar ko‘p tarmoqli tibbiyot markazi rahbari Mamatqul Azizov.
Samarqandda gemodializga muhtoj bo‘lgan bemor bolalarga tibbiy yordam ko‘rsatish maqsadida tashkil etilgan sun’iy buyrak (gemodializ) bo‘limini ochilish marosimida sog‘liqni saqlash vaziri o‘rinbosari Elmira Bositxonova ham ishtirok etgan.
Ma’lum qilinishicha, ushbu bo‘limda ishlash uchun kadrlar Toshkent shahridagi “Respublika ixtisoslashtirilgan nefrologiya, gemodializ va buyrak transplantatsiyasi ilmiy markazi”da birlamchi ixtisoslashtirishdan o‘tkazilgan. Bo‘lim uchun kerakli barcha tibbiy jihozlar, kerakli ehtiyoj qismlar (bir martalik dializatorlar magistrali bilan va tuzli eritmalar) olib kelib joylashtirilib, bemorlarni qabul qilish uchun tayyor holatga keltirilgan. Shuningdek, 75 million so‘m markaz jamg‘arma mablag‘lari hisobidan bo‘lim joriy ta’mirlanib, bemorlarga tibbiy xizmat ko‘rsatishga moslashtirilgan.
Izoh (0)