Prezident administratsiyasi rahbari Zaynilobiddin Nizomiddinov davlat rahbarining ko‘rsatmasi bilan 4-yanvar, dushanba kuni Vazirlar Mahkamasida 2020-yil yakunlari va 2021-yil ustuvor vazifalariga bag‘ishlangan yig‘ilish o‘tkazdi. Bu haqda “Gazeta.uz” xabar bermoqda.
Tadbirda bosh vazir o‘rinbosarlari, maslahatchilar, shuningdek, vazirliklar va xo‘jalik yurituvchi subyektlar rahbarlari ishtirok etgan. Bosh vazirning birinchi o‘rinbosari, hududlarni kompleks rivojlantirish, kommunikatsiyalar, qurilish va uy-joy kommunal xo‘jaligi masalalari bo‘yicha rahbar Ochilboy Ramatovning hisoboti ko‘rib chiqilgan.
Kompleks tarkibiga Uy-joy kommunal xizmat ko‘rsatish vazirligi, Qurilish vazirligi, Transport vazirligi (uning tarkibiga Avtomobil yo‘llari davlat qo‘mitasi kiradi), Ekologiya va atrof muhitni muhofaza qilish davlat qo‘mitasi, Uzbekistan Airways, Uzbekistan Airports kompaniyalari, “O‘zbekiston temiryo‘llari”, “O‘zsanoatqurilishmateriallari”, “Toshshahartransxizmat”, “O‘zshahar qurilish invest” va boshqalar kiradi.
Muzaffar Soliyev.
Foto: “Daryo”
“Gazeta.uz”ning aniqlik kiritishicha, tanqidiy ruhda o‘tgan uchrashuv yakunlari bo‘yicha Prezidentga ma’lumot taqdim etilgan. Shunga asoslanib, davlat rahbari uy-joy kommunal xizmat ko‘rsatish vaziri Muzaffar Soliyevni ishda yo‘l qo‘ygan kamchiliklari, qayta-qayta ogohlantirishlarga qaramay tegishli xulosa chiqarmagani uchun egallab turgan lavozimidan ozod qilish to‘g‘risida qaror qabul qildi. Prezident, shuningdek, Avtomobil yo‘llari davlat qo‘mitasi rahbari Abdurahmon Abduvaliyevga hayfsan e’lon qildi, qurilish vaziri Botir Zokirovga ogohlantirish berdi.
Abdurahmon Abduvaliyev.
Foto: “Gazeta.uz”
Abdurahmon Abduvaliyevga ishdagi kamchiliklarni olti oy ichida bartaraf etish topshirilgan. Aks holda uninig egallab turgan lavozimiga loyiqligi masalasi ko‘rib chiqiladi.
16-dekabr kuni Prezident Shavkat Mirziyoyev qish mavsumiga tayyorgarlikda yo‘l qo‘yilgan xatolarni tanqidiy tahlil qilish hamda oziq-ovqat xavfsizligini ta’minlash masalasiga bag‘ishlangan kengaytirilgan yig‘ilish o‘tkazgandi. Unda davlat rahbari vazirlik va tarmoq rahbarlarini, shu jumladan, Muzaffar Soliyevni tanqid qilgan, deb yozmoqda yig‘ilishni kuzatgan “Gazeta.uz”.
Botir Zokirov.
Foto: “Daryo”
Nashrning yozishicha, Prezident Uy-joy kommunal xizmat ko‘rsatish vazirligida qanday savol va muammolari borligini so‘ragan. Muzaffar Soliyev Toshkent viloyatining uchta tumanida isitish bilan bog‘liq muammolar mavjudligi, ammo ular bir hafta ichida bartaraf etilishiga ishontirgan. Shavkat Mirziyoyev tayyorgarlik yil boshidanoq amalga oshirilayotganiga qaramay, nega ish o‘z vaqtida yakunlanmaganini so‘ragan.
“Biz qozonxonani ta’mirladik, ammo uning ostidagi quvur chirigan bo‘lib chiqdi... Quvurlar uzoq vaqt davomida almashtirilmagan... Mablag‘ ajratildi, tez kunlarda muammolarni hal qilamiz”, — deb javob bergan endilikda sobiq vazir Muzaffar Soliyev.
Muzaffar Soliyev (1975-yilda tug‘ilgan) Uy-joy kommunal xizmat ko‘rsatish vazirligiga 2017-yil 5-iyuldan beri rahbarlik qilgan. Unga qadar mudofaa vazirining front orti va kapital qurilish bo‘yicha o‘rinbosari (2010—2015-yillar), so‘ngra mudofaa vazirining shaxsiy tarkib bilan ishlash bo‘yicha o‘rinbosari (2015—2017-yillar) lavozimlarida ishlagan.
“Kun.uz”ning ma’lum qilishicha, transport vaziri o‘rinbosari Davron Dehqonov ham lavozimidan ozod etilgan.
Davron Dehqonov.
Foto: “Daryo”
Davron Dehqonov muqaddam O‘zbekiston avtomobil transporti agentligiga rahbarlik qilgan, 2019-yil fevralida ushbu agentlik negizida Transport vazirligi tashkil etilgach, vazir o‘rinbosari lavozimida ishlab kelayotgandi.
