Jizzax shahrida qulagan va jamoatchilik muhokamasiga sabab bo‘lgan ko‘p qavatli binoning qurilish jarayonida talab-me’yorlar boshidan oxirigacha buzilgan. Bu haqda 14-yanvar, payshanba kuni o‘tkazilgan matbuot anjumanida qurilish vaziri Botir Zokirov ta’kidlab o‘tdi, deya xabar bermoqda “Daryo” muxbiri Mirolim Isajonov.
“Mazkur binoning qurilish jarayonida talab-me’yorlar boshidan oxirigacha buzilgan. Joyiga borib ko‘rdim, hayotda ko‘p binolarni qurganman, buzganman, ag‘anab tushganlarini ham ko‘rganman. Lekin buzilganda bunaqa mayda-chuyda bo‘lib ketgan binoni birinchi marta ko‘ryapman.
Bu yerda masala nima? Nazorat bo‘lmagani uchun tadbirkor bitta pudratchini topgan va u binoni quryapti, uning xayoli boshidan oxirigacha o‘g‘irlik. Bu bo‘yicha texnik va mualliflik nazorati bo‘lmaganidan keyin quruvchining o‘zi nazorat qila olmaydi. Qurilish konstruksiyalarida ishlatiladigan beton markasi 250—300—400 bo‘ladi. Bu holatda beton markasi 3-4 baravargacha tushirilgan. Shuning hisobiga ustunlarning ko‘tarish imkoni yo‘q”, — dedi vazir.
Zokirov qulagan bino yonidagi tik turgan obyektning qanday usulda buzilishi haqida ham so‘z yuritdi.
“O‘zog‘irsanoatloyiha” bu binoga yaqinlashib bo‘lmasligi va uning 50 metr atrofini to‘sib qo‘yish kerakligini aytyapti. Shu binoni buzish uchun 50 tonnalik maxsus yukni 40 metrgacha ko‘tarib, kesadigan mashina kerak. O‘zbekistonda bunday mashina yo‘q, bizda undan kichkinasi bor. Uni buzish uchun binoning ikki tomoniga 10 ming kub tuproq to‘kib, tiraydi va obyektni tepadan buzib tushadi.
Hozir shuncha mulkni buzib, olib chiqib tashlash uchun juda katta pul ketadi. Qo‘shni uyining zararini qoplash kerak. Shunaqa qilib, “bunaqa odamlarning burni”ni ishqalab, ikkinchi gal mana shunaqa ishga bormaydigan qilish kerak. Men maxsus tashkilot yubordim uni buzishga, faqat pulini to‘laysizlar dedim. Viloyat hokimi “O‘sha tadbirkorni qonuniy chora ko‘rib, pulini to‘lattiraman” deb aytdi. Uyog‘ini prokuratura va boshqalar o‘rgansin, uni nechta egasi bor, hammasi javob beradimi, bittasi javob beradimi, javobini beraveradi, bu ularning ishi. Men u yerga borib, tekshira olmayman, menda vakolat yo‘q. Bu masalada kerakli odamlar qonun oldida javob beradi. Davlat nazorati xodimlarining aybi o‘tgan bo‘lsa, u ham javob beradi. Jinoyat ishi faqat davlat nazoratiga qaratilgan emas”, — dedi qurilish vaziri.
Eslatib o‘tamiz, 10-yanvar kuni Jizzax shahrida yangi qurilayotgan ko‘p qavatli uyning bir qismi qulab tushgan edi. FVV va Bosh prokuraturaning qayd etishicha, voqea oqibatida tan jarohati olgan va halok bo‘lgan fuqarolar bo‘lmagan. Ma’lum qilinishicha, qulab tushgan bino yonidagi 6 qavatli inshootning ham poydevorlarida cho‘kish alomatlari kuzatilgan bo‘lib, hozirda u xavfli holatda turibdi. Halokatni o‘rganish maqsadida bosh vazirning birinchi o‘rinbosari Ochilboy Ramatov boshliq hukumat komissiyasi tuzilgan. Shuningdek, mazkur holat yuzasidan o‘tkazilgan tergovga qadar tekshiruv natijasiga ko‘ra, Jizzax viloyati qurilish sohasida hududiy nazorat inspeksiyasi mansabdor shaxslariga nisbatan Jinoyat kodeksining 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
Izoh (0)