Toshkent shahri Bektemir tumani hokimi vazifasida ishlab kelgan Jahongir Ibrohimov Yunusobod tumaniga hokim etib tayinlandi, deb xabar beradi “Kun.uz”.
2018-yildan buyon Yunusobod tumani hokimi vazifasida ishlab kelgan Rahmonbek Usmonov transport vaziri o‘rinbosari etib tayinlangani munosabati bilan Yunusobod hokimligidan ketgan. 14-yanvar kuni Yunusobod tumani hokimligida poytaxt hokimi Jahongir Ortiqxo‘jayev ishtirokida o‘tkazilgan sessiyada Jahongir Ibrohimov tumanning yangi hokimi sifatida tanishtirilgan.
Jahongir Ibrohimov 1982-yil Toshkent viloyatida tug‘ilgan. 2006-yil Toshkent arxitektura va qurilish institutini tamomlagan. 2017-yildan 2020-yilning avgustigacha Sirdaryo viloyati hokimi o‘rinbosari lavozimida ishlagan. 2020-yil 25-avgustdan hozirgacha Bektemir tumani hokimi lavozimida ishlab kelayotgandi.
Avvalroq O‘zbekiston qurilish vaziriga yangi birinchi o‘rinbosar, Abduqodir Toshqulov oliy ta’lim vaziri, Sherzod Hidoyatov kommunal xizmat ko‘rsatish vaziri etib tayinlangani haqida xabar berilgandi.
Izoh (0)