O‘zboshimcha va noqonuniy qurilmalarga davlat tomonidan bir martalik afv e’lon qilingandi. Endilikda bunday aksiya o‘tkazilmaydi. O‘zboshimcha qurilma egasi esa javobgarlikka tortilishi mumkin. Bu haqda “Kun.uz” ma’lum qildi.
Prezident Shavkat Mirziyoyevning 2018-yil 20-apreldagi “Fuqarolarni ijtimoiy qo‘llab-quvvatlash bo‘yicha qo‘shimcha chora-tadbirlar hamda o‘zboshimchalik bilan qurilgan turar joylarga nisbatan mulk huquqini e’tirof etish bo‘yicha bir martalik umumdavlat aksiyasini o‘tkazish to‘g‘risida”gi farmonida ko‘zda tutilgan bir martalik afv muddati tugagani bois endi o‘zboshimcha va noqonuniy qurilmalar egasi javobgarlikka tortiladi.
Davlat kadastrlari palatasi Toshkent shahar boshqarmasi boshlig‘i Murod Fayzullayevning ma’lum qilishicha, aksiya doirasida Toshkent shahridan 36 ming 568 ta murojaat kelib tushgan, shundan 71 foizi ijobiy hal etilgan, 17 foizi rad etilgan, 12 foizi subyektiv va obyektiv sabablarga ko‘ra komissiya ishchi guruhi o‘rganishida turibdi.
“Aksiya tugaganiga qaramay, 12 foiz arizalar hokimliklarda turganining sababi shundaki, Shayxontohur tumanida Eski shahar hududi, Yunusobod tumanida Hasanboy hududida kanallar bor, bu kabi hududlarda turgan obyektlarga javob berish va ijobiy hal qilish imkoniyati yo‘q. Endi noqonuniy qurilma aniqlanganda chora ko‘riladi. Buyog‘iga aksiya bo‘lmaydi, davlat yerini asrashimiz kerak. Ammo chora ko‘rishdan oldin, birinchi galda tushuntirish ishlari olib boriladi”, – dedi Murod Fayzullayev.
Boshqarma boshlig‘iga ko‘ra, noqonuniy holatlar aniqlanib, kadastr xizmatiga murojaat kelib tushsa, joyiga chiqib vaziyat o‘rganiladi. Agar obyekt o‘zboshimchalik bilan egallangan bo‘lsa, holat yuzasidan tegishli organlarga xabar beriladi va ta’sir choralari ko‘riladi.
Ta’kidlanishicha, 2020-yilda 676 ta holat bo‘yicha ishlar sudga oshirilgan va taqdimnomalar kiritilgan. Masalan, Sergeli tumani “Savatcha” mahallasida 19 ta qurilma tuman hokimligi bilan hamkorlikda joylarda bartaraf etilgan.
Yana 100 ming nafar aholi aksiya doirasida murojaatini bildirmagani ma’lum bo‘lgan.
“Ularning murojaat qilmagani o‘rganilgan. Buning sababi qurilma egalarining mulk huquqini e’tirof etilishiga ehtiyoji bo‘lmagan hamda dolzarb emas”, — degan Kadastr agentligi direktori o‘rinbosari Sherzodxo‘ja Habibullayev.
Adliya vazirligining ma’lumot berishicha, ushbu aksiya davomida respublika bo‘yicha 200 mingga yaqin murojaat bo‘yicha noqonuniy qurilmaga nisbatan mulk huquqi e’tirof etilgan. Bu esa umumiy murojaatlarning 33 foizini tashkil etadi.
Aksiya doirasida qabul qilingan 25 mingga yaqin murojaat bo‘yicha esa komissiya ijobiy xulosasiga qaramasdan, tuman (shahar) hokimlari tomonidan asossiz ravishda qaror qabul qilinmagan.
Avvalroq Toshkent markazidagi kafe va restoranlarning noqonuniy qo‘shimcha qurilmalari olib tashlanayotgani hamda Bo‘stonliqdagi “snos”lar yuzasidan bir qator mansabdorlar qo‘lga olingani haqida xabar berilgandi.
Izoh (0)