15 январь куни Халқ депутатлари Нурафшон шаҳар Кенгашининг навбатдан ташқари 24-сессиясиси бошланди. Сессия ишида вилоят сектор раҳбарлари, депутатлар, шаҳар фаоллари иштирок этмоқда, деб хабар беради Тошкент вилояти ҳокимлиги ахборот хизмати.
Сессия кун тартибига ташкилий масала киритилган. Кун тартибидаги масала юзасидан вилоят ҳокими Рустам Холматов нутқ сўзлаган.
«Вилоят ҳокими Нурафшонни замонавий шаҳарсозлик анъаналарига мувофиқ барпо этиш ишлари суст кетаётганига эътибор қаратди. Шунингдек, шаҳарни ижтимоий-иқтисодий ривожлантириш бўйича йўл қўйилган хато-камчиликлар танқидий таҳлил қилинди», — дейилади хабарда.
Таъкидланишича, Рустам Холматов Нурафшон шаҳри ҳокими лавозимига Музаффар Солиев номзодини тавсия этган. Сессия кун тартибига қўйилган масала юзасидан муҳокамалардан сўнг, Музаффар Солиев Нурафшон шаҳри ҳокими этиб тайинланган.
Сессия ишида, шунингдек, Нурафшон шаҳри ҳокимининг капитал қурилиш ва коммуникация масалалари бўйича ўринбосари бошқа ишга ўтгани муносабати билан ушбу лавозимга Шерзод Усмонов тайинланган.
Аввалроқ уй-жой коммунал хизмат кўрсатиш вазири сифатида ишлаб келган Музаффар Солиев «фаолиятида йўл қўйган камчиликлар, қайта-қайта огоҳлантиришларга қарамай тегишли хулоса чиқармагани учун» эгаллаб турган лавозимидан озод қилинганди.
2019 йилдан буён Нурафшон ҳокими лавозимида ишлаб келган Қаҳрамон Ҳакимов 14 январь куни эгаллаб турган лавозимидан олинган эди.
Изоҳ (0)