Rossiyada COVID-19’ga chalinganlar soni 3,5 mln kishidan oshdi

So‘nggi bir kecha-kunduzda Rossiyada koronavirusga chalinish bilan bog‘liq yana 24 715 ta holat qayd etildi, deb xabar beradi “RBK” COVID-19 tarqalishiga qarshi kurash bo‘yicha tezkor shtab bayonotiga tayanib.

Bu bir sutkalik kasallanish holatlari 24 ming kishidan oshishi kuzatilayotgan ikkinchi kundir. Pandemiya boshidan buyon mamlakatda hammasi bo‘lib 3,5 million kishi virusni yuqtirgan.

So‘nggi 24 soat ichida 555 kishi vafot etgan. Jami o‘lim holatlari soni 64 495 taga teng. Bir sutkada 27 636 kishi, pandemiya boshidan buyon — 2 909 680 kishi sog‘aygan.

Moskva shahrining o‘zida so‘nggi bir kecha-kunduzda koronavirusga chalingan 81 kishi vafot etgan, bu tezkor shtab ma’lumotlariga ko‘ra, pandemiya boshidan buyon eng yuqori ko‘rsatkichdir. Bundan avvalgi rekord 30-mayda qayd etilgan, o‘shanda poytaxtda 78 kishi vafot etgan edi.

Yangi ma’lumotlarni hisobga olganda Moskvadagi jami o‘limlar soni 12 241 taga yetgan.