AQShda 1,3 milliondan ortiq fuqaro koronavirusga qarshi vaksinaning ikkinchi dozasi bilan emlandi. Bu haqda mamlakat Kasalliklar nazorati va profilaktikasi markazi tomonidan e’lon qilingan ma’lumotlarga tayanib, “TASS” xabar berdi.
Ma’lumotlarga ko‘ra, ayni vaqtda AQShda 11 million dozadan ortiq vaksina ishlatilgan bo‘lib, umumiy hisobda 9,7 million kishi emlangan. Ularning 1,3 millioni koronavirusga qarshi immunitetni shakllanishi uchun zarur bo‘lgan vakinaning ikkinchi dozasini olgan.
Ta’kidlanishicha, emlashda ishlatilgan vaksinalarning aksariyati (6,5 million) Amerikaning Pfizer va Germaniyaning BioNTech kompaniyalari tomonidan ishlab chiqarilgan. 4,6 million donasi esa Amerikaning Moderna kompaniyasiga tegishli.
Eslatib o‘tamiz, AQShda Pfizer va BioNTech vaksinalari bilan aholini emlash 14-dekabr kuni boshlangan bo‘lib, birinchi va ikkinchi doza orasidagi muddat 21 kunni tashkil etadi.
Koronavirus tarqalishini real vaqtda kuzatib borayotgan Jon Hopkins universiteti ma’lumotlariga ko‘ra, AQShda koronavirusga chalinganlar soni 23,3 million kishidan, COVID-19 qurbonlari esa 388,5 ming kishidan oshgan.
Izoh (0)