O‘zbekiston va Rossiya olimlari koronavirus va uning mutatsiyalarini radiatsiya (nurlanish)ning kuchsiz dozalari bilan yo‘q qilish mumkinligini aniqladi, deb xabar beradi “Kommersant”. Ta’kidlanishicha, virusni yo‘q qilishda qo‘llanadigan dozadagi radiatsiya odam uchun xavfsiz hisoblanadi.

Foto: “Fotodom”

Radiatsiyaning koronavirusga ta’sirini o‘rganish bilan O‘zbekiston Fanlar akademiyasi va Ural federal universiteti olimlari shug‘ullanyapti. Hozirda ular davolash metodikasini ishlab chiqmoqda.

“Bu g‘oyaning mohiyati shundan iboratki, koronavirusning RNK molekulasi odam hujayrasiga tushganda o‘z uzunligi bo‘ylab ko‘plab qismlarida kuchli deformatsiyalanadi. Aniqlanishicha, virusning RNK molekulasi bo‘ylab deformatsiyalangan joylari sog‘lom hujayralardan ko‘ra radiatsiya ta’siriga ming marotaba ta’sirchan ekan. Bunda radiatsiyaning virus uchun halokatli kuchsiz dozalari odam hujayralariga mutlaq xavfsiz ekani kelib chiqadi”, — deydi UrFU professori Anatoliy Zatsepin.

Mutaxassislarning ta’kidlashicha, radiatsiya ta’sirida nafaqat koronavirusni, balki boshqa viruslarni ham yo‘q qilish mumkin. Olimlar radiatsiya yordamida, shuningdek, turli sirtlarni dezinfeksiyalashni taklif qilmoqda.

Biroq rossiyalik virusolog, tibbiyot fanlari doktori Anatoliy Altshteynning ta’kidlashicha, koronavirusni radiatsiya bilan davolash xavfli bo‘lishi mumkin.

“Odamni radiatsiya bilan davolash kerak emas. Bundan tashqari, radiatsiya turli bo‘ladi. Rentgen va ultrabinafsha nurlanish orasida katta farq bor”, — deydi mutaxassis. Uning ta’kidlashicha, agar bemorga unda koronavirusni o‘ldira oladigan dozada rentgen nurlanish berilsa, aksincha, unga ziyon yetkazib qo‘yish ham mumkin.

“Sirtlarni nurlantirishga kelsak, marhamat, bu yaxshi dezinfeksiyadir. Havoda ultrabinafsha nurlanish bilan viruslar o‘ldiriladi”, — deya ta’kidlaydi olim.

Eslatib o‘tamiz, 2020-yil mayida o‘zbekistonlik olimlar koronavirusga chalinganlar genidagi DNK ketma-ketligini aniqlagan edi.