9-yanvar kuni Indoneziyada Sriwijaya Air aviakompaniyasiga tegishli Boeing 737-500 samolyoti halokatga uchrishi oqibatida 62 kishi halok bo‘lgan edi. Mutaxassislarning ta’kidlashicha, samolyotning halokatga uchrashiga uning pandemiya sabab bir necha oy parvozsiz turib qolgani ham sabab bo‘lgan bo‘lishi mumkin, deb yozadi “Kommersant”.
The Daily Telegraph’ning ma’lum qilishicha, halokatga uchragan Boeing 737-524’dan 2020-yilning 23-martidan 19-dekabriga qadar foydalanilmagan. Ekspertlarning fikricha, bu kabi uzoq muddat turib qolishi texnik muammolarni yuzaga keltirgan.
“Hozirda ushbu samolyotlarni ekspluatatsiyaga qaytarish bo‘yicha jiddiy muammolar yuzaga kelmoqda, chunki ular 9-10 bir joyda turib qolgan, ulardan foydalanilmasa texnik holati yomonlashadi”, — deydi aviatsiya xavfsizligi sohasidagi konsalting kompaniya rahbari Xyu Richi.
AQSh Transportda xavfsizlik bo‘yicha milliy kengashining sobiq xodimi Jon Golining aytishicha, uzoq vaqt yerda turib qolgan samolyotlar ikki hafta davomida yaxshilab texnik ko‘rikdan o‘tishi kerak.
Ekspertlarning ta’kidlashicha, bu qadar uzoq vaqt davomida parvozlarni amalga oshirmagan uchuvchilar ma’lum tayyorgarlikdan o‘tishi kerak. Hozircha Boeing 737-524’ning halokatga uchrashi sabab rasman ma’lum qilinmagan, tergov ishlari davom etmoqda.
Izoh (0)