AQSh Kongressi Senati amaldagi prezident Donald Trampga nisbatan impichment masalasini keyingi davlat rahbari Jo Baydenning inauguratsiyasidan keyin darhol ko‘rib chiqishni boshlaydi, deb xabar bermoqda “RBK” Politico gazetasiga tayanib.
Uning ma’lumotlariga ko‘ra, senatorlar qo‘zg‘olonga gijgijlash bo‘yicha Trampga qarshi surilgan ayblovlarni 20-yanvar kuni mahalliy vaqt bilan 13:00 da (Toshkent vaqti bilan 23:00 da), Bayden o‘z lavozimiga kirishganidan keyin bir soat o‘tib, o‘rganishni boshlashi mumkin. Buning uchun Kongress yuqori palatasi 100 nafar a’zolarining barchasi rozilik berishi kerak.
Shu bilan bir vaqtda senatorlar Bayden Amerika ma’muriyatidagi asosiy lavozimlar uchun ilgari surgan nomzodlarni hamda uning prezident lavozimidagi ilk tashabbuslarini tasdiqlashi kerak bo‘ladi. Trampga impichment e’lon qilish haqidagi masalaning ko‘rib chiqilishi bu jarayonni qiyinlashtirishi mumkin, deb ta’kidlaydi nashr.
Avvalroq Bayden senat “impichment bo‘yicha o‘z konstitutsiyaviy majburiyatlarini amalga oshirishni eplashiga, shu bilan bir vaqtda millatning boshqa shoshilinch masalalari ustida ham ishlashi”ga umid bildirgan edi. Bu bilan u ichki xavfsizlik vaziri, davlat kotibi, moliya vaziri va boshqa lavozimlar uchun nomzodlar tasdiqlanishini, shuningdek, vaksinatsiya dasturlarining amalga oshirilishi va pandemiya oqibatida jabr ko‘rgan iqtisodiyotni tiklashni nazarda tutgan edi.
Senatdagi respublikachilar yetakchisi Mitch Makkonnell Trampga nisbatan impichment uning davlat rahbari lavozimidagi muddati tugashidan oldin e’lon qilinishini ehtimoldan uzoq deb atadi. Uning so‘zlariga ko‘ra, impichmentga aloqador barcha jarayonlar, qoidalar va senat pretsedentlarini hisobga olganda, adolatli yoki jiddiy sud jarayoni Bayden qasamyod qabul qilguniga qadar yakunlanishining imkoniyati yo‘q.
Avvalroq Amerika Kongressining Vakillar palatasi AQSh prezidenti Donald Trampga nisbatan impichment e’lon qilish uchun ovoz berdi. Kongressmenlar Trampga nisbatan ilgari surilgan isyonga da’vat qilish ayblovini tasdiqlagan. Masala Demokratik partiyaning ko‘pchilik ovozi (222 ta) bilan qabul qilingan, bundan tashqari, Respublikachilar partiyasining 10 nafar vakili ham Trampga nisbatan impichment e’lon qilinishini ma’qullab ovoz bergan.
Izoh (0)