“Tezroq amaliyotga joriy qilish kerak”. DSQ, Markaziy bank, Moliya va Iqtisodiyot vazirliklari mas’ullari — daromadlar deklaratsiyasiga doir qonun loyihasi haqida

Korrupsiyaga qarshi kurashish agentligi amaldorlarning daromadlari deklaratsiya qilinishini nazarda tutuvchi qonun loyihasini ishlab chiqdi. 2019-yilda Bandlik va mehnat munosabatlari tayyorlagan qonun loyihasidan farqli o‘laroq (vazirlik loyihasi bo‘yicha, ushbu tartib 2020-yil 1-yanvardan joriy etilishi kerak edi), agentlik taklif qilayotan loyihada quyidan tortib yuqorigacha bo‘lgan barcha mansabdorlar — hatto prezident va bosh vazir ham deklaratsiya to‘ldirishi taklif qilingan. Hujjat loyihasi ijtimoiy tarmoqlarda qizg‘in muhokama qilinmoqda.

Kuni kecha madaniyat, AKT, innovatsion rivojlanish vazirlari, shuningdek, sport vaziri birinchi o‘rinbosarining muhokama qilinayotgan qonun loyihasiga qisqacha munosabati e’lon qilingan edi. “Daryo” muxbiri Mirolim Isajonov ushbu masala yuzasidan yana bir qator vazirlik va idora rahbarlari o‘rinbosarlariga murojaat qilib, ularning fikri bilan qiziqdi.

“Yashirin iqtisodiyotni kamaytirishga xizmat qiladi” — Ahadbek Haydarov, moliya vaziri o‘rinbosari

“Biz bunga ijobiy qaraymiz, albatta. Chunki vazirligimiz davlat budjetiga imkon qadar ko‘p daromad tushishidan manfaatdor. Davlat xodimlarining o‘z daromadlarini deklaratsiya qilish tizimining joriy etilishi keyinchalik yashirin iqtisodiyotni kamaytirishga xizmat qiladi. Shuningdek, korrupsiya darajasini qisqartirishda ham muhim omillardan biri bo‘ladi. Shu paytga qadar deklaratsiya masalasi ko‘p marta aytilgan. Vaqti-soati kelib, mana, qonun loyihasi ham ishlab chiqildi. Bu qonun meni xavotirlantirmaydi, bunga tabiiy hol sifatida qarayman. Ko‘p davlatlarda deklaratsiya tizimi joriy etilgan. Biz ham buni to‘g‘ri qabul qilishimiz kerak”.

“Tezroq amaliyotga joriy qilish kerak” — Mubin Mirzayev, Davlat soliq qo‘mitasi raisi birinchi o‘rinbosari

“Birinchi navbatda soliq organlarining o‘zida daromadlarni deklaratsiya qilish tizimini yo‘lga qo‘ymoqchimiz. Chunki o‘zimiz o‘rnak bo‘lishimiz kerak. Soliq organlarining o‘zi daromadlarini to‘g‘ri ko‘rsatyaptimi, korrupsiyaga qarshi kurashda to‘g‘ri ishtirok etyaptimi, deklaratsiya tizimida o‘zining hissasini qo‘shyaptimi-yo‘qmi, degan savollarga har qanday davlat tashkilotida ishlaydigan xodimlar javob olishi kerak.

Biz mana shularni to‘liq ko‘rsatgan holda qo‘mitamizda pastdan tepagacha deklaratsiya tizimini yo‘lga qo‘yamiz va boshqalarni ham shunga da’vat etamiz. Bu qonunni shubhasiz qo‘llab-quvvatlayman. Deyarli barcha davlatlarda mazkur tizim mavjud va biz ham bunga o‘tishimiz kerak. Agar mamlakatda korrupsiya bo‘lmasa, o‘sha davlat, albatta, rivojlanadi. Korrupsiya bor davlat hech qachon taraqqiy etmaydi.

Ushbu tizimni oldinroq yo‘lga qo‘ysa ham bo‘lardi. Lekin vaqti-soati endi keldi. Deklaratsiyani joriy etish, daromadlarni to‘g‘ri ko‘rsatib, halol ishlash, korrupsiyani maksimal darajada qisqartirish — bu xalqning talabi, siyosat va prezidentimizning talabi. Bu qonun loyihasiga xohishim baland, bu Davlat soliq qo‘mitasi raisi o‘rinbosari sifatida menga juda kerakli hujjat. Uni tezroq qabul qilib, amaliyotga joriy etish lozim”.

“Xarajatlar tarafdan ham nazorat qilsa bo‘ladi” — Ilhom Norqulov, iqtisodiy taraqqiyot va kambag‘allikni qisqartirish vaziri birinchi o‘rinbosari

“Nafaqat daromadlar, balki xarajatlar deklaratsiyasini ham joriy qilishimiz kerak. Chunki xarajatlar tarafdan ham nazorat qilsa bo‘ladi. O‘ylaymanki, bu juda ham dolzarb va kerakli narsa. Bu, bir tarafdan, davlat boshqaruvi sohasidagi xodimlarning amalga oshirayotgan xarajatlari va ularni olayotgan daromadlari qanchalik qonuniyligi hamda o‘zaro mutanosibligini ko‘rsatadi. Ikkinchi tarafdan esa, bu borada jamoatchilikning samarali nazorati yo‘lga qo‘yilsa, shaffoflik bo‘ladi va davlat boshqaruv tizimi vakillariga bo‘lgan ishonchni yanada orttiradi. Shuningdek, korrupsiyaga qarshi kurashda ham muhim omil bo‘lib qoladi. Ushbu qonun loyihasi meni amaldor sifatida umuman xavotirga solgani yo‘q”.

“Hech qanday xavotirli tomoni yo‘q” — Behzod Hamroyev, Markaziy bank raisi o‘rinbosari

“Daromadlar deklaratsiyasi butun dunyoda bor. O‘zbekistonda ham bu masala ko‘p marta ko‘tarildi. Buni yo‘lga qo‘yish kerak. Daromadlarni legallashtirish, soliqdan qochish yoki yashirish hamma sektorda bo‘ladi. Barcha mamlakatlarda, davlat ishchisi bo‘ladimi yoki tadbirkor, farqi yo‘q, jamiyatda bunday holat kuzatiladi. Ammo davlatdan oylik olib, qandaydir lavozimda ishlayotgan bo‘lsa, albatta, jamoatchilik oldida hisobot berishi lozim. Daromad manbasini — kimdan yoki qayerdan olganini oshkor qilsin. Yil davomida tadbirkorlik orqali daromad topgan bo‘lsa yoki ish joyidan oylik, mukofot puli olgan bo‘lsa, bankdan qanchadir kredit olgan bo‘lsa, marhamat, barchasini ko‘rsatsin. Nazarimda, buning hech qanday xavotirli tomoni yo‘q”.