Buxoro viloyat IIB axborot xizmati rahbari Shuhrat Jalolovning “Daryo”ga xabar berishicha, Buxoro shahridagi xonadonlarning biridan 200 ming dollarga teng tilla taqinchoqlarni o‘g‘irlagan uch nafar shaxs qo‘lga olingan.
Ta’kidlanishicha, Buxoro shahar Ichki ishlar organlari faoliyatini muvofiqlashtirish boshqarmasiga Buxoro shahrida yashovchi 47 yoshli fuqaro Z.S.dan murojaat kelib tushgan. Murojaatda aytilishicha, 2020-yilning 25-dekabr kuni soat 16:30 dan 21:30 qadar bo‘lgan vaqt oralig‘ida noma’lum shaxs uning yashash xonadoniga tom orqali kirgan va uyining yotoqxonasidagi seyfdan 99 dona turli xildagi tilla taqinchoqlarini o‘g‘irlagan.
Surishtiruv bo‘yicha xonadon egalariga tegishli 6 dona brilliant taqinchoq, 3 dona tilla soat, 70 ming rubl va 600 yevro, fuqarolik pasporti hamda uyning kadastr hujjatlari o‘g‘irlanib, jabrlanuvchiga jami 200 ming dollarlik moddiy zarar yetkazilgan.
Mazkur holat yuzasidan shahar Ichki ishlar organlari faoliyatini muvofiqlashtirish boshqarmasi 4-son Ichki ishlar bo‘limi huzuridagi tergov guruhi tomonidan noma’lum shaxsga nisbatan Jinoyat kodeksining 169-modda 4-qismi “a” bandi (juda ko‘p miqdorda o‘g‘rilik) bilan jinoyat ishi qo‘zg‘atilib, dastlabki tergov harakatlari olib borilgan.
Olib borilgan tezkor surishtiruv hamda tergov harakatlari davomida jabrlanuvchining hovlisi yaqinidan oqib o‘tuvchi, atrofi qum-tuproqli ariq yonlari kuzatilgan. Kuzatuvlarga ko‘ra, aynan Z.S.ning xonadonigacha yetib kelgan shubhalantiruvchi oyoq izlari topilgan.
Tezkor guruh xodimlarining sa’y-harakati bilan ushbu jinoyat 1991-yilda tug‘ilgan samarqandlik Sh.B., Buxoro shahrida yashovchi fuqarolar — A.K. hamda K.B. tomonidan sodir etilgani aniqlangan. Ulardan 70 dona turli tilla taqinchoq ashyoviy dalil sifatida hujjatlashtirib olingan.
Ayni paytda uch nafar shaxsga nisbatan “qamoqqa olish” ehtiyot chorasi qo‘llanilgan. Holat bo‘yicha dastlabki tergov harakatlari hamda ularning boshqa shu turdagi jinoyatlarga aloqadorligi o‘rganilmoqda.
Izoh (0)