Buxoro viloyatida fuqaro xonadonidagi pechdan tabiiy gaz chiqishi oqibatida yong‘in sodir bo‘lib, uyning 70 kvadrat metr qismi yonib ketgan. Bu haqda “Daryo”ga viloyat Favqulodda vaziyatlar boshqarmasi axborot xizmati xabar berdi.
Ta’kidlanishicha, 2021-yilning 10-yanvar kuni G‘ijduvon tumanidagi “Pozagari” mahallasida yashovchi fuqaro J.Sh.ning yashash uyida yong‘in sodir bo‘lgan. Bu haqdagi xabar soat 18:51 da G‘ijduvon tuman Favqulodda vaziyatlar bo‘limi navbatchilik dispetcheriga kelib tushgach, yong‘in qutqaruv guruhi sa’y-harakati bilan 18:59 da o‘chirilgan.
“Yong‘in o‘chirilgunga qadar xonadonning 70 kvadrat metri maydoni, ichki devorlari, tom qismi va uy jihozlari yongan. Qutqaruvchilar tomonidan uyning 120 kvadrat metr maydoni saqlab qolingan. Hozirda yong‘inning kelib chiqish sababi bo‘yicha surishtiruv ishlari olib borilmoqda. Yong‘in natijasida fuqarolarning kuyish va halok bo‘lish holatlari aniqlanmadi”, — dedi viloyat Favqulodda vaziyatlar boshqarmasi axborot xizmati rahbari Mirjon Fayzullayev.
Ijtimoiy tarmoq foydalanuvchilarining “Daryo”ga bildirishicha, sodir bo‘lgan yong‘in sabab mazkur xonadonning ikki nafar a’zosi shifoxonaga jo‘natilgan.
“Daryo” muxbiri bunga aniqlik kiritish maqsadida G‘ijduvon tuman tibbiyot birlashmasi bosh shifokori Marat Ro‘ziyev bilan suhbatda bo‘ldi.
“Yong‘inda kuygan yoki jarohat olish bilan bog‘liq masalada tibbiyot birlashmamizga hech qanday murojaat kelib tushmagan”, — dedi Marat Ro‘ziyev.
Izoh (0)