Tijorat banklariga kredit so‘rab borilganda bank rahbariyati tomonidan ko‘pincha “resurs yo‘q” degan javob beriladi. Mazkur javob bank xodimining vaziyatdan chiqishga urinishi bo‘lishi ham mumkin. Bu haqda Qarshi shahridagi Jurnalistlar uyida bo‘lib o‘tgan matbuot anjumanida ma’lum qilindi, deya xabar berdi “Daryo” muxbiri.
Qarshi shahridagi Jurnalistlar uyida 8-yanvar kuni Markaziy bankning viloyat boshqarmasi mas’ullari va 16 ta tijorat bankining boshqaruv raislari ishtirokida matbuot anjumani tashkil etildi.
Unda so‘z olgan Markaziy bankning viloyat bosh boshqarmasi boshlig‘i Fayzulla Rajabov “Daryo” muxbirining “Fuqarolar bankdan kredit so‘rab borganda bank rahbariyati tomonidan ‘resurs yo‘q’ degan javob berilishi, mazkur savol katta rahbarlar ishtirokidagi sayyor qabullarda takrorlanganda esa bank rahbariyati ‘resurs yo‘q’ degan javobni aytolmasligining sababi nimada? O‘zi bank rahbariyatining fuqaro murojaatiga javoban bankda ‘resurs yo‘q’ deb javob berishi qay darajada asosli?”, degan savoliga “Mazkur javob tajribasiz xodimning vaziyatdan chiqishga urinishi bo‘lishi ham mumkin”, deya javob berdi.
“Tan olish kerak, mazkur masala joylardagi eng ko‘p muhokamalarga sabab bo‘layotgan holat. Ba’zan joylardagi bank xodimining shu gap orqali vaziyatdan chiqishga urinishini oqlab bo‘lmaydi. O‘sha bank xodimining fikrlashicha, fuqaroning muammosiga yechim — shu. Aslida tijorat bankining bosh maqsadi daromad olishdan iborat. Ya’ni bank omonat jalb qilib, ustiga o‘z foizini qo‘yib, tavakkalchilikka asoslangan kreditlash bilan shug‘ullanadi. Aytmoqchi bo‘lganim, agar bankda resurs bo‘ladigan bo‘lsa, pulni ushlab turishdan bank manfaatdor emas”, — dedi Fayzulla Rajabov.
Markaziy bankning viloyatdagi mas’uli javobiga ko‘ra, bank xodimlarining kredit so‘rab borgan fuqaroga ‘resurs yo‘q’ deyishi bankning iqtisodiy imkoniyatiga bog‘liq bo‘lishi mumkin.
Fayzulla Rajabovning ma’lumot berishicha, 2020-yil Qashqadaryoda bank mijozlariga 364 milliard so‘m kredit berilishi rejalashtirilgan bo‘lsa-da, viloyat banklari mazkur yilda aholiga 481 milliard so‘m kredit bergan.
“Endi savol tug‘iladi, reja 361 milliard so‘m bo‘lgan bo‘lsa, banklar 481 milliard so‘m kredit bergan. Xo‘sh, qolgan mablag‘ qayerdan olingan, deyishingiz mumkin. Bizga Moliya vazirligi tomonidan 2018-yildan boshlab dasturlarni moliyalashtirish uchun kerakli mablag‘ berib kelinmoqda. Ana o‘sha 2018-yilda aholiga berilgan kredit mablag‘larining asosiy qismi bugungi kunga kelib qayta boshladi. Biz aynan shu qaytgan mablag‘lar hisobidan aholiga ko‘proq kredit berdik”, — deydi Markaziy bankning viloyat bosh boshqarmasi boshlig‘i.
Fayzulla Rajabovning qo‘shimcha ma’lumot berishicha, viloyatda aholiga berilgan ijtimoiy kreditlarning bugungi kunga kelib 18 milliard so‘mi qaytmagan bo‘lsa, tijorat kreditlaridan qaytmagan mablag‘ 300 milliard so‘mdan oshiqroqni tashkil qiladi.
“Aholiga berilgan kreditlarning o‘z vaqtida qaytmasligi resurs taqchilligiga olib keluvchi asosiy sabab hisoblanadi”, — deydi Fayzulla Rajabov.
Mavzuga doir:
Izoh (0)