“O‘zdavgeolqo‘m”ning sobiq rahbari To‘lqin Shoyoqubov vafot etdi

O‘zbekiston SSR sobiq geologiya vaziri va O‘zbekiston davlat geologiya va mineral resurslar qo‘mitasining sobiq raisi To‘lqin Shoyoqubov 3-yanvar kuni 88 yoshida vafot etdi, deb xabar bermoqda “Gazeta.uz”.

To‘lqin Shoyoqubov 1933-yil Toshkentda tug‘ilgan. Geologiya va mineral resurslar sohasidagi mehnat faoliyatini 1955-yildan boshlagan. 1982-yilda O‘zbekiston SSR geologiya vaziri o‘rinbosari, 1986-yilda — geologiya vaziri bo‘lgan. 1991—1999-yillarda O‘zbekiston davlat geologiya va mineral resurslar qo‘mitasiga rahbarlik qilgan.

“Uning rahbarligi ostida va bevosita ishtirokida polimetallar — Xondiz, oltin — Ko‘chbuloq va Qizil-Olma, litiy — Shovozsoy va boshqa ko‘plab konlar o‘rganilib, O‘zbekistonning mineral-xomashyo bazasini kengaytirish va mustahkamlash, uning bu borada mustaqilligini ta’minlash imkonini berdi”, — deyiladi O‘zbekiston davlat geologiya qo‘mitasi matbuot xizmati xabarida.

Geologiya sohasini rivojlantirishga qo‘shgan hissasi uchun To‘lqin Shoyoqubov ko‘plab hukumat mukofotlari bilan, jumladan, “Fidokorona mehnati uchun” medali (1970) va Ko‘kdumaloq neft va gaz konini qidirishga rahbarlik qilgani uchun “Do‘stlik” ordeni, “O‘zbekiston SSRda xizmat ko‘rsatgan geolog” unvoni (1975), SSSR davlat mukofoti (1988) va O‘zbekiston faxriy yorlig‘i (1993) bilan taqdirlangan. U Rossiya Tabiiy fanlar akademiyasi va Nyu-York Fanlar akademiyasi (AQSh) va boshqa qator tashkilotlarning a’zosi bo‘lgan.

Smartgov konsalting direktori Aziza Umarova To‘lqin Shoyoqubovning vafoti munosabati bilan uning hayotini hikoya qilib, nekrolog yozib qoldirdi.

“To‘lqin aka nafaqat davlat arbobi, balki o‘zining katta oilasining ajoyib xonadon egasi ham bo‘lgan. Men uni bolaligidan bilardim, u xolamizning qaynotasi va mening xolavachchalarimning sevimli bobosi. U buyuk an’ana — Nabiralar kuniga asos soldi. Har yili dekabr oyining oxirida barcha nabiralari unga yil davomida erishgan yutuqlari haqida so‘zlab beradigan hisobot konsertini tayyorlardi. Shoyoqubovlar oilasida u ustun, mayoq va monumental shaxs bo‘lgan. Unda g‘oyat donolik, diplomatlik va hayotni tushunish, shu bilan birga, nozik hazil qilish qobiliyati bor edi. To‘lqin aka Shoyoqubov singari insonlar mamlakatimiz taraqqiyotiga ulkan hissa qo‘shdi. Ushbu hissani yodda saqlash kerak”, — deb ta’kidlagan Aziza Umarova.

Avvalroq Energetika va mexanika sohasidagi olim, O‘zbekiston Fanlar akademiyasi akademigi, texnika fanlari doktori, professor To‘lqin Bekmurodov 85 yoshida vafot etgani haqida xabar berilgan edi.