Ўзбекистон ССР собиқ геология вазири ва Ўзбекистон давлат геология ва минерал ресурслар қўмитасининг собиқ раиси Тўлқин Шоёқубов 3 январь куни 88 ёшида вафот этди, деб хабар бермоқда «Gazeta.uz».
Тўлқин Шоёқубов 1933 йил Тошкентда туғилган. Геология ва минерал ресурслар соҳасидаги меҳнат фаолиятини 1955 йилдан бошлаган. 1982 йилда Ўзбекистон ССР геология вазири ўринбосари, 1986 йилда — геология вазири бўлган. 1991—1999 йилларда Ўзбекистон давлат геология ва минерал ресурслар қўмитасига раҳбарлик қилган.
«Унинг раҳбарлиги остида ва бевосита иштирокида полиметаллар — Хондиз, олтин — Кўчбулоқ ва Қизил-Олма, литий — Шовозсой ва бошқа кўплаб конлар ўрганилиб, Ўзбекистоннинг минерал-хом ашё базасини кенгайтириш ва мустаҳкамлаш, унинг бу борада мустақиллигини таъминлаш имконини берди», — дейилади Ўзбекистон давлат геология қўмитаси матбуот хизмати хабарида.
Геология соҳасини ривожлантиришга қўшган ҳиссаси учун Тўлқин Шоёқубов кўплаб ҳукумат мукофотлари билан, жумладан, «Фидокорона меҳнати учун» медали (1970) ва Кўкдумалоқ нефть ва газ конини қидиришга раҳбарлик қилгани учун «Дўстлик» ордени, «Ўзбекистон ССРда хизмат кўрсатган геолог» унвони (1975), СССР давлат мукофоти (1988) ва Ўзбекистон фахрий ёрлиғи (1993) билан тақдирланган. У Россия Табиий фанлар академияси ва Нью-Йорк Фанлар академияси (АҚШ) ва бошқа қатор ташкилотларнинг аъзоси бўлган.
Смартгов консалтинг директори Азиза Умарова Тўлқин Шоёқубовнинг вафоти муносабати билан унинг ҳаётини ҳикоя қилиб, некролог ёзиб қолдирди.
«Тўлқин ака нафақат давлат арбоби, балки ўзининг катта оиласининг ажойиб хонадон эгаси ҳам бўлган. Мен уни болалигидан билардим, у холамизнинг қайнотаси ва менинг холаваччаларимнинг севимли бобоси. У буюк анъана — Набиралар кунига асос солди. Ҳар йили декабрь ойининг охирида барча набиралари унга йил давомида эришган ютуқлари ҳақида сўзлаб берадиган ҳисобот концертини тайёрларди. Шоёқубовлар оиласида у устун, маёқ ва монументал шахс бўлган. Унда ғоят донолик, дипломатлик ва ҳаётни тушуниш, шу билан бирга, нозик ҳазил қилиш қобилияти бор эди. Тўлқин ака Шоёқубов сингари инсонлар мамлакатимиз тараққиётига улкан ҳисса қўшди. Ушбу ҳиссани ёдда сақлаш керак», — деб таъкидлаган Азиза Умарова.
Аввалроқ Энергетика ва механика соҳасидаги олим, Ўзбекистон Фанлар академияси академиги, техника фанлари доктори, профессор Тўлқин Бекмуродов 85 ёшида вафот этгани ҳақида хабар берилган эди.
Изоҳ (0)