Qashqadaryoda elektr uzilishlari sababli suv ta’minoti to‘xtadi

Qashqadaryoning bir qator tumanlari elektr ta’minotidan to‘liq uzilgani sabab suv ta’minotida muammolar yuzaga keldi.

Ma’lumotlarga ko‘ra, 4-yanvar kuni soat 06:59 da va 10:10 da Qashqadaryo viloyati “Muborak neft va gaz qazib chiqarish boshqarmasi”ga qarashli neft va gaz qazib chiqarish konlarini elektr energiyasi bilan ta’minlab turgan “Neftchi” podstansiyasida rele himoyadan o‘chgan.

Tolimarjon IESga yetarli miqdorda gaz bormagani uchun ikkita energoblok to‘xtagan. Oqibatda Qashqadaryoning beshta tumanida to‘liq elektr energiyasidan uzilish holati ro‘y bergan va Shahrisabz, Kitob, Yakkabog‘ tumanlarida joylashgan suv ishlab chiqarish inshootlari faoliyati to‘xtagan. Oqibatda aholiga suv yetkazib berishda ham muammolar yuzaga kelgan.

Qayd etilishicha, hozirda “Issiqlik manbayi” faoliyatida ham uzilish ro‘y berib, ko‘pqavatli uylarning isitish tizimi to‘liq quvvat bilan ishlamayapti.

“Qashqadaryo Suvta’minot”ning Qarshi shahar bo‘limi tarafidan viloyat aholisiga maxsus texnikalarda ichimlik suvi yetkazib berilmoqda.

Eslatib o‘tamiz, viloyat hokimi Zoir Mirzayev viloyatda elektr ta’minoti soatlab rejasiz uzilayotgani ustidan bosh vazir Abdulla Aripovga shikoyat qilgandi. Bosh vazir vaziyat ikki kunda o‘nglanishini va’da bergandi.

Avvalroq Qashqadaryoning nafaqat tumanlari, balki ma’muriy markazi hisoblangan Qarshi shahrida ham elektr ta’minotida olti soatlab uzilishlar bo‘layotgani haqida xabar berilgan edi.