Xorazm viloyati Bog‘ot tuman tibbiyot birlashmasi tez tibbiy yordam bo‘limiga 4-yanvar, dushanba kuni soat 19:30 da mazkur hududning Bog‘ot shaharchasi “Hurriyat” mahallasida yashaydigan 1989-yilda tug‘ilgan E.J.ning oila a’zolari olib kelingan. Dastlabki tekshiruvlar natijasida ularga is gazidan o‘tkir zaharlanish tashxisi qo‘yilgan. Bu haqda Sog‘liqni saqlash vazirligi matbuot xizmati xabar berdi.
Ma’lumotlarga ko‘ra, yosh oila — xonadon sohibi E.J. va uning turmush o‘rtog‘i P.D. 1989-yilda, ularning qizi 2011-yilda, o‘g‘li esa 2013-yilda tug‘ilgan. Tez tibbiy yordam bo‘limiga olib kelinganda P.D. hamda uning qizida biologik o‘lim aniqlangan.
Ayni paytda xonadon sohibi va uning o‘g‘lida is gazidan o‘tkir zaharlanish, miya shishi koma holati aniqlanib, tibbiy yordam ko‘rsatilmoqda.
Favqulodda holat sodir bo‘lishidan ikki kun oldin E.J. xonadonida issiqlik qozoni yangi o‘rnatilgan bo‘lgan.
Avvalroq Qoraqalpog‘istonda bir oilaning 4 nafar a’zosi va 2 nafar mehmon hamda Sirdaryoda 31 yoshli ayol va uning voyaga yetmagan 3 nafar farzandi is gazidan zaharlanib vafot etgani haqida xabar berilgandi. Shuningdek, Navoiyda ikki nafar aka-uka is gazidan zaharlanib vafot etgani, Samarqandda qo‘lbola pechdan is gazi sizib chiqishi oqibatida yosh er-xotin vafot etgani xabar berilgan, keyinroq ular ikki kun avval turmush qurgani ma’lum bo‘lgandi.
Izoh (0)