Хоразм вилояти Боғот туман тиббиёт бирлашмаси тез тиббий ёрдам бўлимига 4 январь, душанба куни соат 19:30 да мазкур ҳудуднинг Боғот шаҳарчаси «Ҳуррият» маҳалласида яшайдиган 1989 йилда туғилган Э.Ж.нинг оила аъзолари олиб келинган. Дастлабки текширувлар натижасида уларга ис газидан ўткир заҳарланиш ташхиси қўйилган. Бу ҳақда Соғлиқни сақлаш вазирлиги матбуот хизмати хабар берди.
Маълумотларга кўра, ёш оила — хонадон соҳиби Э.Ж. ва унинг турмуш ўртоғи П.Д. 1989 йилда, уларнинг қизи 2011 йилда, ўғли эса 2013 йилда туғилган. Тез тиббий ёрдам бўлимига олиб келинганда П.Д. ҳамда унинг қизида биологик ўлим аниқланган.
Айни пайтда хонадон соҳиби ва унинг ўғлида ис газидан ўткир заҳарланиш, мия шиши кома ҳолати аниқланиб, тиббий ёрдам кўрсатилмоқда.
Фавқулодда ҳолат содир бўлишидан икки кун олдин Э.Ж. хонадонида иссиқлик қозони янги ўрнатилган бўлган.
Аввалроқ Қорақалпоғистонда бир оиланинг 4 нафар аъзоси ва 2 нафар меҳмон ҳамда Сирдарёда 31 ёшли аёл ва унинг вояга етмаган 3 нафар фарзанди ис газидан заҳарланиб вафот этгани ҳақида хабар берилганди. Шунингдек, Навоийда икки нафар ака-ука ис газидан заҳарланиб вафот этгани, Самарқандда қўлбола печдан ис гази сизиб чиқиши оқибатида ёш эр-хотин вафот этгани хабар берилган, кейинроқ улар икки кун аввал турмуш қургани маълум бўлганди.
Изоҳ (0)