“Jinoiy guruh tarkibida amaldorlar ham, farroshlar ham bor”. IIV vakili Andijonda IMEI kodlarni ro‘yxatdan o‘tkazishda kuzatilgan noqonuniy holat haqida

2020-yilning yanvar—dekabr oylarida mobil qurilmalarning IMEI kodini ro‘yxatga olishdan maxsus hisobraqamga 240 milliard so‘m mablag‘ kelib tushgan. Bu haqda 4-yanvar, dushanba kuni O‘zbekiston Telekommunikatsiya tarmoqlarini boshqarish respublika markazida o‘tkazilgan matbuot anjumanida ma’lum qilindi, deya xabar bermoqda “Daryo” muxbiri Mirolim Isajonov.

Ichki ishlar vazirligi mas’ul xodimi Baxtiyor Sulaymonovning aytishicha, mobil qurilmalar IMEI kodini ro‘yxatdan o‘tkazish maqsadida fuqarolarning pasport ma’lumotlarining sotilishi yoki o‘zlashtirilishi va boshqa shaxsning nomiga rasmiylashtirish kabi noqonuniy xatti-harakatlar ham kuzatilmoqda. Bunday holat oxirgi marta 2020-yilning oktabr oyida aniqlangan va bu bo‘yicha jinoyat ishi qo‘zg‘atilgan.

“Mazkur masalada 7 mingga yaqin rasmiy murojaat kelib tushgan. Ushbu raqam boshida kamroq edi, ammo murojaatlar o‘rganilganda, bunday holatlarning aniqlangani hozircha 7 mingga yaqinlashdi. Balki, bundan ham oshar, chunki tergov harakatlari davom ettirilyapti. Murojaat qilgan fuqarolarning shikoyatlarini ro‘yxatga olib, tergovga yo‘naltirganmiz”, — dedi Sulaymonov.

Uning qo‘shimcha qilishicha, fuqarolarning pasport ma’lumotlari asosida boshqa shaxs nomiga mobil qurilmalar IMEI kodini ro‘yxatdan o‘tkazish holati O‘zbekistondagi hamma karantin zonalarida kuzatilgan.

“Andijon viloyatida kuzatilgan bunday holat uyushgan jinoiy guruh tomonidan amalga oshirilganligi aniqlangan. Uyushgan jinoiy guruh tarkibida karantin zonada ishlagan oddiy farroshdan tortib, mansabdor shaxsgacha bor. Kim qaysi darajada jinoyat sodir qilgani hali ma’lum emas. Bu bo‘yicha tergov jarayoni davom etmoqda. Yana holatlar aniqlanib, tergovga qo‘shib borilyapti. Kimlar murojaat qilmagan bo‘lsa, ularni o‘zimiz aniqlab, chaqirib, holat haqida batafsil so‘rab olyapmiz.

Yuqorida aytilgan 7 mingga yaqin holatning 5 mingtadan ortig‘i uyushgan jinoiy guruh tomonidan sodir etilgan. Hozir bu haqda aniq raqamni bilmayman, ochig‘i. Chunki bunday noqonuniy holat respublikadagi barcha karantin zonalarida kuzatilgan. Bitta Andijonda emas, Toshkent viloyati va boshqa joyda ham kuzatilgan”, — dedi IIV rasmiysi.

Avvalroq Andijon viloyati IIB xodimlari tomonidan fuqarolarning shaxsiga doir ma’lumotlardan noqonuniy foydalanib, ularning nomiga IMEI tizimi orqali telefonlarni ro‘yxatdan o‘tkazish bilan shug‘ullanib kelgan shaxslar qo‘lga olingani, holat yuzasidan Jinoyat kodeksining 182-modda 2-qismi (bojxona to‘g‘risidagi qonun hujjatlarini buzish) hamda 141-modda 1-qismi (fuqarolarning teng huquqliligini buzish) bilan jinoyat ishi qo‘zg‘atilgani haqida xabar qilingan edi.