Davlat soliq qo‘mitasi oltita tirajda yutuqli chek o‘yinlari o‘tkazib, ularning har birida 120 ta qimmatbaho sovrinlar, shu jumladan 6 ta Chevrolet Nexia-3 avtomobili o‘ynaldi. Bu haqda qo‘mita matbuot xizmati xabar berdi.
2020-yil iyul oyida boshlangan chek o‘yinlari quyidagi maqsadda o‘tkazilgan:
- iste’molchilarni yashirin iqtisodiyotga qarshi kurashga yo‘naltirish: yutuqli chek o‘yinlari fuqarolarning xarid qilingan tovarlar (ishlar yoki xizmatlar) uchun to‘lov faktini tasdiqlovchi cheklar va boshqa hujjatlarni talab qilishga odatlanishiga turtki bo‘ldi.
- savdo va xizmat ko‘rsatish sohasidagi hisob-kitoblarni tartibga solish, tushumni kirim qilmaslikka odatlanganlarni halol yo‘lga qaytarib, qonunlarni hurmat qiluvchi korxonalar bilan teng sharoitlarda raqobatlashishga boshlash.
“O‘yinning birinchi tirajida jami 1,8 milliard so‘mlik 9 947 ta chek ishtirok etgan bo‘lsa, oltinchi tirajda raqamlar sezilarli darajada yiriklashdi — 63,3 milliard so‘mlik 159 774 ta chek ro‘yxatdan o‘tkazildi. Ya’ni ishtirokchilar soni 17-marta oshdi”, — deb qayd etilgan qo‘mita xabarida.
Yutuqli o‘yinni o‘tkazish davrida (2020-yil iyuldan) onlayn-NKM yoki virtual kassalardan jami 51,5 million dona 14,2 trillion so‘mlik cheklar chop etilgan.
Bundan tashqari, qo‘mita onlayn-NKMlarni qo‘llash borasida yuz berayotgan qoidabuzarliklar haqida DSQning “Soliq hamkor” tizimi va aloqa manbalari orqali fuqarolar murojaatlari ko‘payganini qayd etgan.
“Chek o‘yinlari tufayli onlayn-NKMdan tushumlar respublikada jami 9,6 trillion so‘mni tashkil etdi, shundan 4,5 trillion so‘m Toshkent shahri hisobiga to‘g‘ri keldi. Taqqoslash uchun, birinchi tiraj o‘tkazilgan davrga nisbatan tushumlar 6,2 marta o‘sgan”, — deyiladi DSQ xabarida.
Soliq qo‘mitasi muhim iqtisodiy samaradan tashqari, aholining iste’mol madaniyati va faol jamoatchilik nazorati oshganligini ham qayd etgan.
Davlat soliq qo‘mitasi yutuqli chek o‘yinlari 2021-yilda ham davom etishini bildirgan.
Izoh (0)