“Daryo”ni Telegram’da o‘qing! Join!
21:11, 26.11.2020 27725

Sirdaryoda 31 yoshli ayol va uning voyaga yetmagan 3 nafar farzandi is gazidan zaharlanib vafot etdi

Sirdaryo viloyatining Xovos tumanida 25-noyabr kuni bir oilaning to‘rt nafar a’zosi is gazidan zaharlanib vafot etdi. Bu haqda “Daryo”ga Bosh prokuratura matbuot xizmati xabar berdi.

Ma’lum qilinishicha, tumanning “Do‘stlik” MFY, Xiyobon ko‘chasida yashovchi 31 yoshli ayol Z.N. va uning 10 yoshli o‘g‘li Sh.Q. qo‘lbola usulda yasalgan pechdan chiqqan is gazidan kuchli zaharlanib, uyida vafot etgan.

Shuningdek, ayolning 7 va 3 yoshdagi yana ikki nafar o‘g‘li is gazidan zaharlanib, Xovos tumani tibbiyot birlashmasining jonlantirish bo‘limiga yotqizilgan. Ular 26-noyabr kuni jonlantirish bo‘limida vafot etgan.

Holat yuzasidan Xovos tumani prokuraturasi tomonidan tergovga qadar tekshiruv o‘tkazilmoqda.

Avvalroq Nukusda ijarada yashayotgan 4 nafar talaba qiz, Yangiyo‘lda bir oilaning 5 nafar a’zosi is gazidan zaharlangani xabar berilgan edi. Bundan tashqari, Navoiyda ikki nafar aka-uka, Samarqandda turmush qurganiga ikki kun bo‘lgan yosh er-xotin is gazidan zaharlanib vafot etgandi.

Izoh qoldirishdan avval, qoidalar bilan tanishib oling: http://dy.uz/QbkeZ

Boshqa yangiliklar