AQSh aholisini koronavirusga qarshi emlash kampaniyasi logistika muammolari tufayli belgilangan muddatdan ancha orqada qolmoqda. Bu haqda New York Times gazetasiga tayanib “RBK” xabar bermoqda.
Nashrning ma’lum qilishicha, Florida shtatida shifokorlar qariyalarning vaksinatsiya qilinishi kutilganiga qaramay, mavjud dozalarning to‘rtdan bir qismidan kamini ishlatgan. Puerto-Rikoda xodimlarning bayram kunlarida ta’tilga chiqib ketishi tufayli yuklarni yetkazib berish to‘xtab qolgan. Kaliforniyada shifokorlar preparat umumiy tanqisligidan xavotirda.
Shu bois, vaksinatsiyaning uchinchi haftasiga kelib mamlakatda belgilangan jadvaldan ortda qolmoqda. Dastlab, rasmiylar 2020-yil oxiriga qadar 20 million amerikalikni emlashni rejalashtirgandi. 31-dekabr kuni federal hukumat AQSh Pfizer va Moderna kompaniyalaridan 14 million dozadagi vaksinalar olganligini ma’lum qildi. Ammo Kasalliklarni nazorat qilish va oldini olish markazlarining ma’lumotlariga ko‘ra, o‘sha kunga kelib atigi 2,8 million kishi emlangan.
Federal hukumat kechiktirish sababini aniq bilmaydi. Ammo NYT’ning yozishicha, mahalliy sog‘liqni saqlash boshqarmasi rahbarlari va shifoxona bosh shifokorlari bir nechta omillarni keltirib o‘tgan. Ulardan biri — Rojdestvo va Yangi yil bayrami munosabati bilan ta’tillar mavsumi. Ikkinchisi, davlat tasarrufidagi qariyalar uyiga vaksina yetkazib berishdagi kechikishlardir.
Emlash rejasidan orqada qolishning yana bir sababi — sog‘liqni saqlash tizimidagi mutasaddilar va tibbiyot muassasalari xodimlariga yuklamalar oshgani. Buning oqibatida ular emlash kampaniyasi detalizatsiyasi va preparatlarni tarqatishga ulgurmayapti.
12-dekabr kuni AQSh Oziq-ovqatlar va dorilar sifati bo‘yicha boshqarmasi (FDA) AQShning Pfizer kompaniyasi va Germaniyaning BioNTech kompaniyasi tomonidan birgalikda ishlab chiqilgan vaksinani ro‘yxatdan o‘tkazishni ma’qulladi. Oradan bir soat o‘tgach, amaldagi prezident Donald Tramp 24 soat ichida vaksinatsiya boshlanishi haqida ma’lum qildi.
AQSh rasmiylari rejasiga ko‘ra, mamlakat bo‘ylab 600 dan ortiq emlash markazlari 14—16-dekabr kunlari vaksinalarni olishlari kerak edi. Birinchi haftada ularga 2,9 million doza vaksina tarqatilishi kerak edi. Vaksinatsiya uchun shtat rasmiylari va sog‘liqni saqlash mahalliy boshqarmalari javobgar.
Dekabr oyi oxirida Nyu-York shtatida vaksinatsiya sohasida firibgarlik bo‘lishi mumkinligi haqida ma’lum bo‘ldi. Politsiya preparatlarni qabul qilib olish, ularni jismoniy shaxslarga berganlikda va vaksinatsiya rejasini buzganlikda gumon qilinayotgan mahalliy klinikalar tarmog‘ida tergov ishlarini boshladi. AQShda koronavirusga qarshi vaksina bilan bog‘liq firibgarliklar uchun 1 million dollar jarima solinadi.
Izoh (0)