АҚШ аҳолисини коронавирусга қарши эмлаш кампанияси логистика муаммолари туфайли белгиланган муддатдан анча орқада қолмоқда. Бу ҳақда New York Times газетасига таяниб «РБК» хабар бермоқда.
Нашрнинг маълум қилишича, Флорида штатида шифокорлар қарияларнинг вакцинация қилиниши кутилганига қарамай, мавжуд дозаларнинг тўртдан бир қисмидан камини ишлатган. Пуэрто-Рикода ходимларнинг байрам кунларида таътилга чиқиб кетиши туфайли юкларни етказиб бериш тўхтаб қолган. Калифорнияда шифокорлар препарат умумий танқислигидан хавотирда.
Шу боис, вакцинациянинг учинчи ҳафтасига келиб мамлакатда белгиланган жадвалдан ортда қолмоқда. Дастлаб, расмийлар 2020 йил охирига қадар 20 миллион америкаликни эмлашни режалаштирганди. 31 декабрь куни федерал ҳукумат АҚШ Pfizer ва Moderna компанияларидан 14 миллион дозадаги вакциналар олганлигини маълум қилди. Аммо Касалликларни назорат қилиш ва олдини олиш марказларининг маълумотларига кўра, ўша кунга келиб атиги 2,8 миллион киши эмланган.
Федерал ҳукумат кечиктириш сабабини аниқ билмайди. Аммо NYT’нинг ёзишича, маҳаллий соғлиқни сақлаш бошқармаси раҳбарлари ва шифохона бош шифокорлари бир нечта омилларни келтириб ўтган. Улардан бири — Рождество ва Янги йил байрами муносабати билан таътиллар мавсуми. Иккинчиси, давлат тасарруфидаги қариялар уйига вакцина етказиб беришдаги кечикишлардир.
Эмлаш режасидан орқада қолишнинг яна бир сабаби — соғлиқни сақлаш тизимидаги мутасаддилар ва тиббиёт муассасалари ходимларига юкламалар ошгани. Бунинг оқибатида улар эмлаш кампанияси детализацияси ва препаратларни тарқатишга улгурмаяпти.
12 декабрь куни АҚШ Озиқ-овқатлар ва дорилар сифати бўйича бошқармаси (FDA) АҚШнинг Pfizer компанияси ва Германиянинг BioNTech компанияси томонидан биргаликда ишлаб чиқилган вакцинани рўйхатдан ўтказишни маъқуллади. Орадан бир соат ўтгач, амалдаги президент Дональд Трамп 24 соат ичида вакцинация бошланиши ҳақида маълум қилди.
АҚШ расмийлари режасига кўра, мамлакат бўйлаб 600 дан ортиқ эмлаш марказлари 14—16 декабрь кунлари вакциналарни олишлари керак эди. Биринчи ҳафтада уларга 2,9 миллион доза вакцина тарқатилиши керак эди. Вакцинация учун штат расмийлари ва соғлиқни сақлаш маҳаллий бошқармалари жавобгар.
Декабрь ойи охирида Нью-Йорк штатида вакцинация соҳасида фирибгарлик бўлиши мумкинлиги ҳақида маълум бўлди. Полиция препаратларни қабул қилиб олиш, уларни жисмоний шахсларга берганликда ва вакцинация режасини бузганликда гумон қилинаётган маҳаллий клиникалар тармоғида тергов ишларини бошлади. АҚШда коронавирусга қарши вакцина билан боғлиқ фирибгарликлар учун 1 миллион доллар жарима солинади.
Изоҳ (0)