Germaniya kansleri Angela Merkel kansler sifatida Yangi yil arafasida so‘nggi marta xalqqa murojaat qildi, deya xabar bermoqda Reuters’ga tayanib “Korrespondent.net”.
Merkel o‘z murojaatida 2020-yil 15 yillik rahbarligi davomida eng og‘ir yil bo‘lganini aytib, vatandoshlariga koronavirus tarqalishiga qarshi kurashda qilgan sa’y-harakatlari uchun minnatdorchilik bildirdi.
Angela Merkel shifokorlarning xizmatlarini alohida ta’kidlab o‘tdi. Shuningdek, u pandemiyaga qaramay, ko‘plab odamlar, jumladan, supermarketlarda, yuk mashinalarida, pochta aloqasi shoxobchalarida, jamoat transportida, politsiya uchastkalarida, maktablar hamda bolalar bog‘chalarida, cherkovlar va ommaviy axborot vositalarida faoliyat yuritganlarning qo‘shgan hissasi tufayli hayot davom etganini ta’kidladi.
Merkel COVID-19 pandemiyasiga qarshi kurash asrning siyosiy, ijtimoiy va iqtisodiy jihatdan qiyin vazifasi bo‘lganini ma’lum qildi.
Germaniya hukumati rahbari nemislarga niqob taqqani va ijtimoiy masofani saqlagani uchun minnatdorchilik bildirdi. “Boshqalarga e’tibor berish va sog‘lom fikrning namoyon bo‘lishi — insonparvarlik belgisi”, — deydi Merkel.
Mavzuga doir: Germaniyalik uchuvchi koronavirusga qarshi vaksinatsiya boshlangani sharafiga osmonda shprits shaklini “chizdi”
Angela Merkel Germaniya boshqa muammolarni ham e’tibordan chetda qoldirmasligi kerakligini aytdi va 2021-yilda koronavirus asosiy mavzu bo‘lmasligini ta’kidladi.
Merkel dunyo tez va tubdan o‘zgarib bormoqda, shuning uchun Germaniya kelajak uchun bor kuchi va ijodkorona harakati bilan dadil g‘oyalarni ishlab chiqishi kerak, deb hisoblaydi, masalan, iqlimga salbiy ta’sir ko‘rsatmaydigan iqtisodiyot sohasida.
Bundan tashqari, Angela Merkel mamlakatda belgilangan tartibi bo‘yicha koronavirusga qarshi emlanayotganini aytdi.
“Bir necha kun oldin pandemiya ustidan g‘alaba qozonish umidlari paydo bo‘ldi. Bu umidlar birinchi emlanganlar — keksa odamlar va ularga g‘amxo‘rlik qilayotgan reanimatsiya bo‘limlaridagi tibbiyot xodimlari yuzlarida aks etdi. Nafaqat bizning mamlakatimizda, balki butun Yevropa va boshqa ko‘plab mamlakatlarda shunday bo‘ldi”, — dedi siyosatchi.
Shuningdek, 66 yoshli Merkel o‘z navbati kelganda koronavirusga qarshi emlanishini ma’lum qildi. Robert Kox nomidagi Virusologiya institutining emlash dasturiga ko‘ra, kansler emlanish huquqiga ega bo‘lgan to‘rtinchi guruhga (65—69 yosh) kiritilgan.
Angela Merkel 2021-yilning sentabr oyidagi saylovlarda qatnashmasligi va siyosatdan nafaqaga chiqish niyatini yana bir bor tasdiqladi va bu uning Germaniya kansleri sifatidagi so‘nggi Yangi yil murojaati ekanini ma’lum qildi.
Avvalroq Germaniyada 16-dekabrdan boshlab karantin choralari kuchaytirilgani hamda Germaniyada birinchi bo‘lib 101 yoshli ayol koronavirusga qarshi emlangani haqida xabar berilgandi.
Izoh (0)