Avstraliya bosh vaziri Skott Morisson mahalliy tub aholining hurmati uchun mamlakat milliy madhiyasidagi bitta so‘zning o‘zgartirilishini e’lon qildi. U o‘zining Yangi yil murojaatida bu qiyin kechgan 2020-yildan keyin millat birligini mustahkamlashini ta’kidladi. Bu haqda The Guardian xabar qildi.
Madhiyaning “biz yoshmiz va ozodmiz” deb kuylangan ikkinchi satri endi “biz birmiz va ozodmiz” so‘zlari bilan ijro etiladi. Ta’kidlanishicha, Avstraliya davlati nisbatan yosh bo‘lsa-da, bu yerlarda tub sivilizatsiya inglizlar kelguniga qadar ming yillar davomida mavjud bo‘lgan. Ana shundan kelib chiqib madhiya so‘zlariga o‘zgartirish kiritilgan.
Bu g‘oya Yangi Janubiy Uels shtati rahbari Gledis Berejiklyan tomonidan taqdim etilgan. Madhiyadagi o‘zgarishlar Avstraliya parlamentining ikkala palatasi tomonidan qo‘llab-quvvatlandi.
“Rivojlan, go‘zal Avstraliya” tantanali qo‘shig‘i 1878-yilda yozilgan. Bu qo‘shiq 1984-yildan buyon mamlakat madhiyasi bo‘lib kelmoqda. Bungacha Avstraliyada “Xudo qirolichani asrasin” qo‘shig‘i milliy madhiya sifatida ijro etilgan.
Izoh (0)