O‘zbekistondagi viloyat hokimliklarining matbuot xizmati “Xalq so‘zi online” nashriga bergan ma’lumoti asosida viloyat rahbarlari Yangi yilni qanday kutib olishi ma’lum qilindi.
Ma’lum bo‘lishicha, Andijon viloyatida korxona-tashkilot va muassasalar rahbarlari, jumladan, viloyat hokimi Shuhrat Abdurahmonov Yangi yilni o‘z ish joyida kutib oladi.
“Biz Andijon viloyatining 3 million 172 ming 116 nafar aholisi tinchligi, osoyishtaligiga mas’ulmiz. Xalqimiz bayramni ko‘ngildagidek nishonlashi uchun hamma sharoitni yaratish, bayram tadbirlarini ko‘ngildagidek o‘tkazishlarini ta’minlash shu kunning eng katta vazifasidir. Shu sabab shu kuni viloyatdagi barcha rahbarlar o‘z ish joylarida bo‘ladi va Yangi yilni xizmat faoliyati davomida kutib oladi.
Biz uchun viloyatimiz aholisining tan-sihatlikda, tinchlik-xotirjamlikda o‘tgan har bir soniyasi katta bayramdir!”, – deydi viloyat hokimi Shuhrat Abdurahmonov.
Sirdaryo viloyati hokimi G‘ofur Mirzayev Yangi yil bayrami kuni ishxonada o‘zi navbatchilik qiladi, bu har yili takrorlanadigan holat ekani ma’lum qilingan.
Hokimning oilasi va farzandlari Yangi yil kirishidan oldin viloyatdagi Yurt bayrog‘i maydoniga keladi, G‘ofur Mirzayev ular bilan birga maydonni aylanib, sayr qiladi. Yangi yil kirish vaqti hokim uyiga kirib chiqadi va yana ishga qaytadi.
Navoiy viloyat hokimi Qobul Tursunovning ham bayram kungi ish tartibi odatiy ish kunidek tig‘iz.
Bugun ham u hokimlikdagi kundalik qabullardan so‘ng Nurota tumanidagi “Muruvvat uyi”ga borib muassasada yashovchilarni Yangi yil bayrami bilan qutlab, sovg‘alarni topshirgan.
Qaytishda esa hokim G‘ozg‘on shahrida istiqomat qiluvchi Ikkinchi jahon urushi ishtirokchisi 96 yoshli Tursunqul ota Ergashevni bayram bilan qutlashga ham ulgurgan. Qabuliga kelganlar bilan ham gaplashgan.
Viloyat hokimi kunning qolgan qismidagi o‘z rejalarini quyidagicha bayon etgan.
“Biz har yili aka-uka, opa-singillar soat to‘qqizdan o‘tib, tug‘ilib voyaga yetgan hovlimizga yig‘ilamiz. Ota-onamizni bayram bilan qutlab, keyin tarqalamiz. Bugun ham shunday, hozir hoji boboni tabriklab, keyin uyga qaytaman. Yangi yilni oilamiz farzandlarimiz davrasida kutib olaman.
Navoiyda har yili 30 mingga yaqin kishi Yangi yilni o‘z ish o‘rinlarida kutib olishadi. Ular ishi uzluksiz tashkil etilgan NKMK va “Navoiy azot”, “Qizilqumsement”, Navoiy IES ishchi mutaxassislari hamda sog‘liqni saqlash muassasalari va tinchlik, osoyishtaligimiz posbonlaridir. Yangi yil kirgach, mazkur korxona va tashkilotlar rahbarlari bilan bog‘lanib, bayram bilan qutlash bahonasida vaziyatdan ogoh bo‘laman. Uyda qolish yoki qolmaslikni vaziyatga qarab belgilayman”, – deydi Qobul Tursunov.
Samarqand viloyati hokimi Erkinjon Turdimov ham Yangi yil bayrami kuni odatda kun davomida ish joyida bo‘ladi. Ayni daqiqalarda ham viloyat hokimligida davlat ishlari bilan band. Navbatchilar ishining borishini nazoratga olgan.
Shu o‘rinda bir ma’lumot, bugungi kunda samarqandliklarni ko‘tarinki kayfiyatda Yangi yilni kutib olishlari uchun shaharning aholi gavjum bo‘lgan 7 ta hududida bayram archalari o‘rnatilgan.
Mazkur archalar atrofida 2020-yilning 15-dekabridan 2021-yilning 15-yanvariga qadar bayram tadbirlari, konsert dasturlari va turli xil ko‘ngilochar tomoshalar namoyish etilmoqda.
Erkinjon Turdimov tungi vaqtda shaharning Kimyogarlar, So‘lim va Farhod qo‘rg‘oni hamda viloyat musiqali drama teatri binosining old qismi, temiryo‘l vokzali, Sattepo maskani va Qorasuv mavzesida o‘rnatilgan mazkur Yangi yil archalarining barchasiga shaxsan borib, aholining bayram kayfiyati bilan qiziqadi. Shuningdek, bu joylarda fuqarolar xavfsizligini ta’minlash hamda ularning pandemiya qoidalariga rioya qilayotganligini o‘rganadi.
Samarqand viloyat hokimligi axborot xizmatining ma’lumot berishicha, viloyat hokimi bayramda kechki payt oila davrasida bo‘lishga ham ulguradi.
Qashqadaryo viloyati hokimi Zoir Mirzayev Yangi yil kirish daqiqalarida oilasi davrasida bo‘ladi.
“Har yili Mustaqillik, Navro‘z va Yangi yil bayramlarida Prezidentimiz tabriklarini oilaviy eshitish odat tusiga kirib qolgan. Bu holat ko‘pchilikda kuzatilsa kerak. Shunday ekan, telefon orqali bo‘lsa ham samarqandlik qarindoshlarni tabriklab, biroz Qarshi shahridagi o‘zgarishlarni ko‘zdan kechirib, ayniqsa, kommunal sohada viloyatimizda muammo chiqmasligiga amin bo‘lganimdan so‘ng uyga oshiqaman”, – deydi viloyat hokimi.
Izoh (0)