Ўзбекистондаги вилоят ҳокимликларининг матбуот хизмати «Халқ сўзи online» нашрига берган маълумоти асосида вилоят раҳбарлари Янги йилни қандай кутиб олиши маълум қилинди.
Маълум бўлишича, Андижон вилоятида корхона-ташкилот ва муассасалар раҳбарлари, жумладан, вилоят ҳокими Шуҳрат Абдураҳмонов Янги йилни ўз иш жойида кутиб олади.
«Биз Андижон вилоятининг 3 миллион 172 минг 116 нафар аҳолиси тинчлиги, осойишталигига масъулмиз. Халқимиз байрамни кўнгилдагидек нишонлаши учун ҳамма шароитни яратиш, байрам тадбирларини кўнгилдагидек ўтказишларини таъминлаш шу куннинг энг катта вазифасидир. Шу сабаб шу куни вилоятдаги барча раҳбарлар ўз иш жойларида бўлади ва Янги йилни хизмат фаолияти давомида кутиб олади.
Биз учун вилоятимиз аҳолисининг тан-сиҳатликда, тинчлик-хотиржамликда ўтган ҳар бир сонияси катта байрамдир!», – дейди вилоят ҳокими Шуҳрат Абдураҳмонов.
Сирдарё вилояти ҳокими Ғофур Мирзаев Янги йил байрами куни ишхонада ўзи навбатчилик қилади, бу ҳар йили такрорланадиган ҳолат экани маълум қилинган.
Ҳокимнинг оиласи ва фарзандлари Янги йил киришидан олдин вилоятдаги Юрт байроғи майдонига келади, Ғофур Мирзаев улар билан бирга майдонни айланиб, сайр қилади. Янги йил кириш вақти ҳоким уйига кириб чиқади ва яна ишга қайтади.
Навоий вилоят ҳокими Қобул Турсуновнинг ҳам байрам кунги иш тартиби одатий иш кунидек тиғиз.
Бугун ҳам у ҳокимликдаги кундалик қабуллардан сўнг Нурота туманидаги «Мурувват уйи»га бориб муассасада яшовчиларни Янги йил байрами билан қутлаб, совғаларни топширган.
Қайтишда эса ҳоким Ғозғон шаҳрида истиқомат қилувчи Иккинчи жаҳон уруши иштирокчиси 96 ёшли Турсунқул ота Эргашевни байрам билан қутлашга ҳам улгурган. Қабулига келганлар билан ҳам гаплашган.
Вилоят ҳокими куннинг қолган қисмидаги ўз режаларини қуйидагича баён этган.
«Биз ҳар йили ака-ука, опа-сингиллар соат тўққиздан ўтиб, туғилиб вояга етган ҳовлимизга йиғиламиз. Ота-онамизни байрам билан қутлаб, кейин тарқаламиз. Бугун ҳам шундай, ҳозир ҳожи бобони табриклаб, кейин уйга қайтаман. Янги йилни оиламиз фарзандларимиз даврасида кутиб оламан.
Навоийда ҳар йили 30 мингга яқин киши Янги йилни ўз иш ўринларида кутиб олишади. Улар иши узлуксиз ташкил этилган НКМК ва «Навоий азот», «Қизилқумцемент», Навоий ИЭС ишчи мутахассислари ҳамда соғлиқни сақлаш муассасалари ва тинчлик, осойишталигимиз посбонларидир. Янги йил киргач, мазкур корхона ва ташкилотлар раҳбарлари билан боғланиб, байрам билан қутлаш баҳонасида вазиятдан огоҳ бўламан. Уйда қолиш ёки қолмасликни вазиятга қараб белгилайман», – дейди Қобул Турсунов.
Самарқанд вилояти ҳокими Эркинжон Турдимов ҳам Янги йил байрами куни одатда кун давомида иш жойида бўлади. Айни дақиқаларда ҳам вилоят ҳокимлигида давлат ишлари билан банд. Навбатчилар ишининг боришини назоратга олган.
Шу ўринда бир маълумот, бугунги кунда самарқандликларни кўтаринки кайфиятда Янги йилни кутиб олишлари учун шаҳарнинг аҳоли гавжум бўлган 7 та ҳудудида байрам арчалари ўрнатилган.
Мазкур арчалар атрофида 2020 йилнинг 15 декабридан 2021 йилнинг 15 январига қадар байрам тадбирлари, концерт дастурлари ва турли хил кўнгилочар томошалар намойиш этилмоқда.
Эркинжон Турдимов тунги вақтда шаҳарнинг Кимёгарлар, Сўлим ва Фарҳод қўрғони ҳамда вилоят мусиқали драма театри биносининг олд қисми, темир йўл вокзали, Саттепо маскани ва Қорасув мавзесида ўрнатилган мазкур Янги йил арчаларининг барчасига шахсан бориб, аҳолининг байрам кайфияти билан қизиқади. Шунингдек, бу жойларда фуқаролар хавфсизлигини таъминлаш ҳамда уларнинг пандемия қоидаларига риоя қилаётганлигини ўрганади.
Самарқанд вилоят ҳокимлиги ахборот хизматининг маълумот беришича, вилоят ҳокими байрамда кечки пайт оила даврасида бўлишга ҳам улгуради.
Қашқадарё вилояти ҳокими Зоир Мирзаев Янги йил кириш дақиқаларида оиласи даврасида бўлади.
«Ҳар йили Мустақиллик, Наврўз ва Янги йил байрамларида Президентимиз табрикларини оилавий эшитиш одат тусига кириб қолган. Бу ҳолат кўпчиликда кузатилса керак. Шундай экан, телефон орқали бўлса ҳам самарқандлик қариндошларни табриклаб, бироз Қарши шаҳридаги ўзгаришларни кўздан кечириб, айниқса, коммунал соҳада вилоятимизда муаммо чиқмаслигига амин бўлганимдан сўнг уйга ошиқаман», – дейди вилоят ҳокими.
Изоҳ (0)