Koronavirus ehtimol endemik bo‘lib qoladi va odam u bilan yonma-yon yashashga o‘rganadi. Bu haqda Jahon sog‘liqni saqlash tashkiloti (JSST) eksperti, professor Devid Xeymann ma’lum qildi, deb yozadi “RBK”.
“Aftidan, SARS-CoV-2 odamning qolgan to‘rtta koronavirusi kabi endemik bo‘lib qoladi”, — dedi u. Mutaxassis fikricha, virus odam hujayralarida ko‘paygani sari mutatsiyaga uchrashda davom etadi, bu ayniqsa, kasallik keng tarqalgan hududlarda yuz beradi.
Endemik kasalliklar — ma’lum bir joyga bog‘liq bo‘lgan infeksiyalar.
Xeymann taxmin qilishicha, odamlar koronavirus bilan yonma-yon yashay oladi, chunki ularda allaqachon “hayotlarni saqlab qolish uchun vositalar” mavjud.
JSSTning favqulodda vaziyatlar bo‘yicha dasturi rahbari doktor Mayk Rayan ta’kidlashicha, hozir hatto ommaviy vaksinatsiya ham virus tarqalishini to‘liq to‘xtata olmaydi. U odamlar uchun juda past darajali bo‘lsa-da, xavf bo‘lib qoladi.
Avvalroq JSST bosh direktori Tedros Gebreyesus dunyo hamjamiyati 2021-yilda koronavirusning yangi shtammlarini tadqiq qilishga jiddiy e’tibor qaratishi kerakligini qayd etgan edi. JSST bosh direktori Buyuk Britaniya va Janubiy Afrika Respublikasiga “test o‘tkazish orqali yangi turlarni aniqlagani” uchun minnatdorlik bildirdi, shuningdek, boshqa mamlakatlarni koronavirusning yangi shtammlari haqidagi ma’lumotlar bilan bo‘lishishga chaqirdi.
Buyuk Britaniyada sentabr oyida koronavirusning yangi, yuqumliroq B.1.1.7 shtammi aniqlandi. Dekabr o‘rtalariga kelib, Londondagi kasallanish holatlarining uchdan ikki qismi virusning shu varianti bilan bog‘liq bo‘lib qoldi. 20-dekabrdan Britaniya hukumati yangi shtamm tufayli koronavirusga qarshi cheklovlarni kuchaytirdi. Ayni vaqtda yangi shtamm boshqa mamlakatlarda ham qayd etila boshladi. Xususan, Kanada, Italiya, Hindiston, Birlashgan Arab Amirliklari, AQShda “britancha” shtamm aniqlangan.
Izoh (0)