Koronavirus pandemiyasi jiddiy ekologik oqibatlarga olib kelishi mumkin. Bunga sabab 2020-yil ishlab chiqarilgan 52 milliard tibbiy niqobning 1,5 milliardidan ortig‘i bu yil dunyo okeaniga tashlangan bo‘lishi mumkin. Bu haqda okeanlarni himoya qiluvchi tashkilot – Oceans Asia tomonidan e’lon qilingan.
Ekologik faollarning hisob-kitoblariga ko‘ra, bu dunyo okeanining 4680–6240 tonna plastik bilan qo‘shimcha ifloslanishiga olib keladi. Niqoblar polipropilen – yupqa plastik tolalardan tayyorlanadi, ular parchalanishi uchun 450 yil kerak bo‘ladi. Tashkilot ta’kidlashicha, vaqt o‘tishi bilan niqoblar parchalanib, mikroskopik plastik zarrachalarga aylanadi va bu okeanlar ekotizimlariga jiddiy xavf tug‘dirishi mumkin.
“Okeanning plastik ifloslanishi har yili 100 mingga yaqin dengiz sutemizuvchi va toshbaqalarini, milliondan ortiq dengiz qushlarini va hatto undan ham ko‘proq baliqlarni, umurtqasiz hayvonlar hamda boshqa jonzotlarni nobud qilmoqda”, – deydi Oceans Asia direktori Geri Stouks.
U shuningdek, ifloslanish baliqchilik va sayyohlik sanoatiga ham salbiy ta’sir ko‘rsatishi va dunyo iqtisodiyotiga yiliga 13 milliard dollar zarar yetkazishini ta’kidladi.
Okean ifloslanishiga qarshi kurash choralaridan biri sifatida tashkilot hukumatlariga ko‘pmartalik niqoblardan foydalanishni rag‘batlantirish va bir martalik polipropilen niqoblarning barqaror alternativalarini ishlab chiqishda yordam berishni maslahat berdi.
Avvalroq O‘zbkiston Innovatsion rivojlanish vaziri ishlatilgan niqoblarni ko‘chaga tashlamaslikka chaqirgandi.
Izoh (0)