Navalniyga qarshi yangi jinoyat ishi qo‘zg‘atildi. U xayriya sifatida yig‘ilgan 356 mln rublni o‘g‘irlashda gumonlanmoqda

Rossiya Tergov qo‘mitasi (TQ) Aleksey Navalniyga qarshi yangi jinoyat ishi qo‘zg‘atilgani haqida xabar berdi, deb yozadi Meduza.

Tergov versiyasiga ko‘ra, Navalniy, KKF (Korrupsiyaga qarshi kurash fondi) va boshqa notijorat fondlarning “haqiqiy rahbari sifatida”, “boshqa shaxslar bilan hamkorlikda” xayriya sifatida yig‘ilgan va faqat fond maqsadlari uchun mo‘ljallangan 588 million rublning 356 millionini shaxsiy maqsadlari yo‘lida sarflagan. TQ qayd etishicha, Navalniy bu pulga ko‘chmas mulk va moddiy qiymatliklar sotib olgan, shuningdek, xarajatlar uchun, shu jumladan, chet eldagi hordiq uchun ishlatgan. “Shu tariqa, fuqarolardan yig‘ilgan mablag‘lar o‘g‘irlangan”, deyiladi idora press-relizida. Jinoyat ishi uyushgan guruh tomonidan o‘ta yirik miqdorda sodir etilgan firibgarlik haqidagi modda bo‘yicha qo‘zg‘atilgan, u 10 yilgacha ozodlikdan mahrum etishni ko‘zda tutadi.

Navalniy yangi ishni o‘zining zaharlanishi bo‘yicha tekshiruv bilan bog‘ladi. “Men rolikda o‘sha payt aytgan edim, ular meni o‘sha samolyotda o‘lmaganim va keyin o‘z qotillarimni qidirganim uchun qamoqqa tiqishga urinib ko‘radi deb. Hamma narsaning ortida shaxsan Putin turganini isbotlaganim uchun”, — deb yozdi siyosatchi Instagram’da. U “uni o‘ldirishga uringunlaricha ham jim turmaganini, endi esa undan ham battar bo‘lishi”ni qo‘shib qo‘ydi. Navalniyning hududiy shtablari tarmog‘i rahbari Leonid Volkov, o‘z navbatida, KKF va shtablar xayriyachilar qarshisida ham, Rossiya Adliya vazirligi qarshisida ham ochiqchasiga yilda bir marta barcha xayriyalar haqida hisobot berishini eslatdi. “Mamlakatimizdagi eng katta kraudfanding kampaniyasini ‘firibgarlik’ deb e’lon qilish — KFFning butun Rossiya bo‘yicha yuz minglab tarafdorlari yuziga tupurish demakdir”, — deb yozdi Volkov Telegram’da.

Jazolarni ijro etish federal xizmati bir kun avval Navalniyga shartli muddatni haqiqiysiga almashtirish bilan tahdid qilgan edi — “Iv Roshe” ishi bo‘yicha. Idora Germaniyada bo‘lib turgan Navalniy shartli hukm majburiyatlarini bajarmayotgani (u 30-dekabrgacha sinov muddatida turibdi) va jinoiy-ijro inspeksiyasi nazoratidan bo‘yin tovlayotganini ma’lum qildi. The Lancet jurnalidagi, siyosatchining “Novichok” guruhidagi zahar bilan zaharlangani haqidagi maqolaga tayanib, Jazolarni ijro etish federal xizmati 12-oktabrgacha Navalniyda “kasallikning barcha oqibatlari o‘tib ketgani”ni aytdi va 29-dekabr kuni ertalab soat 9 da idoraning Moskvadagi filialiga yetib kelishni talab qildi, aks holda sinov muddati shartlari buzilgani uchun haqiqiy muddat tayinlash haqidagi ariza bilan sudga murojaat qilishga va’da berdi. 29-dekabr kuni esa Jazolarni ijro etish federal xizmati sudga murojaat qilish-qilmasligi borasida hech qanaqa bayonot e’lon qilmadi.

Yangi jinoyat ishi — KKFga nisbatan ochilgan xayriyalar bilan bog‘liq ikkinchi ishdir. 2019-yil yozida Moskvadagi ommaviy noroziliklar fonida TQ fond xodimlariga qarshi pul yuvish haqida jinoyat ishi ochgan edi. Tergov versiyasiga ko‘ra, 2016—2018-yillarda ular jinoiy yo‘l bilan qo‘lga kiritilgan naqd pullarni bankomatlar orqali turli banklardagi hisoblarga kiritgan, so‘ng bu mablag‘lar KKFga o‘tkazilgan. Dastlab bir milliard rubl haqida gap borgan, so‘ng summa 75 milliongacha tushirilgan. KKF ofislarida bir necha marta tintuv o‘tkazilgan, fond xodimlari so‘roq qilishga chaqirilgan. Hozirgi paytgacha hech kimga ayblov e’lon qilinmagan, ish yopilgani haqida ham xabar berilmagan.